عمران خان دی گھر والی نے مریم نواز نوں قنونی نوٹس گھل دتا

اسلام آباد(پنجابی میڈیا گروپ)چیئرمین تحریک انصاف عمران خان دی گھر والی بشری بی بی نے الزام تراشی کرن اُتے مریم نواز نوں قنونی نوٹس گھل دتا۔سابق وزیر اعظم دی گھر والی بشری بی بی نے مریم نواز دے خلاف باضابطہ قنونی کارروائی شروع کر دتی، ایس حوالے نال مسلم لیگ (ن)دی نائب صدر مریم نوازنوں قنونی نوٹس فیصل فرید ایڈووکیٹ دی وساطت نال گھلیا گیا اے جس وچ مریم نواز توں مطالبہ کیتا گیا اے کہ 7 دناں وچ بشری بی بی توں غیر مشروط معافی منگن۔مریم نواز دے الزاماں اُتے مبنی تقریر دا متن وی نوٹس دا حصہ بنایا گیا اے، نوٹس وچ تنبیہ کیتی گئی اے کہ مسلم لیگ ن دی رہنما نے یکم مئی نوں لہور وچ اک تقریر وچ بشری بی بی دے خلاف جھوٹی تے بے بنیاد الزام تراشی کیتی، ایس بیان نوں واپس نہ لین اُتے اوہناں نوں ضابطہ فوجداری تے ہتکِ عزت سنے متعلقہ قنون تحت کٹہرے وچ کھڑا کیتا جائے گا۔