اگر آئین کہندااے کہ90دناں وچ الیکشن ہوں تے ساہنوں ایس اُتے عمل کرنا ہوئے گا،چیف جسٹس

لہور(پنجابی میڈیاگروپ)چیف جسٹس سپریم کورٹ جسٹس عمر عطا بندیال نے آکھیا اے کہ اگر آئین کہندا اے کہ 90 دناں وچ الیکشن ہون گے تے ساہنوں اوس اُتے عمل درآمد کرنا ہوئے گا ساڈے کول اوس دے سوا کوئی دُوجا رستہ نہیں۔سابق چیف جسٹس آف پاکستان آنجہانی مسٹر جسٹس اے آر کارنیلیس کانفرنس وچ اقلیتاں دے حقوق دے عنوان نال خطاب کردیاں ہویاں جسٹس عمر عطا بندیال نے کہ ساہنوں اپنے سینئر جسٹس کارنیلئس نوں خراج تحسین پیش کرن لئی جمع ہوئے ہاں، جسٹس کارنیلئس مجسم انصاف سن، اوہناں نوں قنون سنے دُوجے بوہت سارے علماں اُتے کمال حاصل سی ۔اوہناں نے آکھیا کہ جسٹس کارنیلئس نے دنیا دے اعلی ترین اداریاں توں تعلیم حاصل کیتی، اوہ سول سروس دے عہدے اُتے تعینات ہوسکدے سن مگر اوہناں نے قنون انصاف دا شعبہ چُنیا، اوہناں نے سپریم کورٹ نوں17ورھے دتے، اوہ اک چنگے قنون دان تے سادگی پسند سن ایسی لئی اوہناں دی زندگی ججاں لئی اک مثال اے ،جسٹس عمر عطا بندیال نے آکھیا کہ پاکستان وچ اقلیتاں نوں مکمل آزادی حاصل اے، آئین پاکستان اقلیتاں دے حقوق دے تحفظ دا ضامن اے، جسٹس کارنیلئس نے گورنر جنرل ولوں اسمبلی توڑن دے عمل نوں غیر قنونی قرار دتاسی، 1964 وچ 2 صوبیاں نے جماعت اسلامی اُتے پابندی عائد کیتی لیکن مولانا مودودی کیس وچ ایہ پابندی ہٹادتی گئی، 3 دہائیاں دے دوران انتہا پسندی پاروں بے شمار جاناں گئیاں۔اوہناں نے آکھیا کہ عدالتاں ایگزیکٹو آرڈر پاس نہیں کرسکدیاں، پاکستان دے ہر شہری نوں بنیادی حقوق حاصل نیں تے آئین دی حفاظت ساڈے بنیادی فرائض وچ شامل اے ۔اوہناں دا کہنا سی کہ بنیادی انسانی حقوق اُتے فیصلہ کرن دا اختیار سپریم کورٹ نوں حاصل اے، جسٹس کارنیلئس نے آکھیا کہ ایگزیکٹو آفیسر بنیادی حقوق دا فیصلہ نہیں کرسکدے، عدالتاں دے فیصلے دی اخلاقی اتھارٹی ہُندی اے، عدالتی فیصلہ چیلنج نہ ہوئے تے ایہ حتمی فیصلہ بن جاندا اے ۔جسٹس عمر عطا بندیال نے ملک بھر وچ بیک ویلے الیکشن کیس دے حوالے نال آکھیاکہ ساہنوں دسیا گیا اے کہ سیاسی جماعتاں دے درمیان مذاکرات جاری نیں، ساڈا ایس معاملے نال کوئی لینا دینا نہیں، سیاسی جماعتاں نوںاحساس اے کہ آئین دی پاس داری کرنا اوہناں دی ڈیوٹی اے،اسیں اوہناں دی سپورٹ لئی موجود ہاں ورنہ دُوجی صورت وچ ساڈا فیصلہ موجود اے۔اوہناں نے آکھیا کہ فیصلے آئین تے قنون دے مطابق ہونے چاہیدے نیں تے ایسی فیصلے وچ مورال اتھارٹی ہُندی اے ،جسٹس عمر عطا بندیال نے آکھیا کہ فیصلے آئین دی روح مطابق ہونے چاہیدے اگر آئین کہندا اے90 دناں وچ الیکشن ہون گے تے ساہنوں ایس اُتے عمل درآمد کرنا ہوئے گا ساڈے کول اوس دے سوا کوئی دُوجا رستہ نہیں اے ایہ کسی دی چوائس دی نہیں بلکہ آئین دی گل اے۔