القادر ٹرسٹ کیس: نیب نے چیئرمین پی ٹی آئی عمران خان نوں گرفتارکرلئیا

اسلام آباد(پنجابی میڈیا گروپ)قومی احتساب بیورو(نیب)نے سابق وزیراعظم عمران خان نوں القادر ٹرسٹ کیس وچ گرفتار کرلئیا، عمران خان نوں رینجرز نے اسلام آباد ہائیکورٹ دے احاطے توں گرفتارکیتا۔چیئرمین پی ٹی آئی عمران خان 2 مقدمیاں وچ ضمانت لئی اسلام آباد ہائیکورٹ دے احاطے وچ موجودسن لیکن اجے کمرہ عدالت تک نہیں پہنچے سن،سابق وزیراعظم بائیو میٹرک لئی جداںہی اپنی وہیل چیئر توں اُترے تے اوہناں نوں رینجرز نے گرفتار کرلئیا۔ذرائع مطابق قومی احتساب بیورو(نیب)نے چیئرمین پی ٹی آئی نوں القادر ٹرسٹ کیس وچ گرفتارکیتا اے،نیب حکام کول عمران خان دی گرفتاری دے وارنٹ موجود سن۔سابق وزیراعظم عمران خان دی احاطہ عدالت توں گرفتاری اُتے چیف جسٹس اسلام آباد ہائیکورٹ نے نوٹس لیندیاں ہویاں آئی جی اسلام آبادنوں 15منٹ وچ سدھ لئیا۔چیف جسٹس اسلام آباد ہائیکورٹ نے آکھیا کہ15منٹ وچ آئی جی اسلام آبادتے سیکرٹری داخلہ پیش ہون،اگر پیش نہ ہوئے تے وزیراعظم نوں بلا سکدے ہاں، ایہ وی دسن کہ کیوں تے کس کیس وچ عمران خان نوں گرفتار کیتا گیا اے؟ٔآئی جی اسلام آباد نے آکھیا کہ عمران خان نوں القادر ٹرسٹ کیس وچ گرفتارکیتا گیا اے،حالات معمول دے مطابق نیں، اسلام آبادوچ دفعہ144نافذ کر دتی گئی اے جس دی خلاف ورزی دی صورت وچ کارروائی ہوئے گی۔آئی جی اسلام آباد نے ہور دسیا کہ چیئرمین تحریک انصاف عمران خان نوں نیب پنڈی منتقل کردتا گیا اے جیتھے اوہناں دا طبی معائنہ کیتا جائے گا۔القادر یونیورسٹی کیس وچ عمران خان دی گھر والی بشری بی بی نے نیب انکوائری نوں اسلام آباد ہائیکورٹ وچ چیلنج کر دتا اے، درخواست وچ چیئرمین تے ڈی جی نیب پنڈی نوں فریق بناندیاں ہویاں موقف اختیارکیتا گیا اے کہ سیاسی مخالفاں نے بے بنیاد الزاماں اُتے نیب تحقیقات شروع کیتی، عدالت نیب دی انکوائری اُتے تفصیل فراہم کرن دا حکم دیوے ۔ وزیرداخلہ رانا ثنا اللہ نے چیئرمین پی ٹی آئی عمران خان دی گرفتاری اُتے ردعمل دیندیاں ہویاںآکھیا کہ اوہناں دے خلاف کیس، ڈاکیومنٹریاں نیں، دُوجیاں اُتے الزام لان والا خود کرپشن کر رہیا سی، نیب وچ عمران خان دے خلاف انکوائری چل رہی سی جس وچ قومی خزانے نوں50ارب روپے نقصان دا معاملہ اے،القادر ٹرسٹ وچ5ارب روپے دی جائیداد اوہناں دے نام اُتے اے۔اوہناں نے آکھیا کہ ایس کیس وچ گرفتاری دے بغیر ریفرنس عدالت وچ پیش کیتا جاسکدا سی، بار بار نوٹس دے باوجود عمران خان نے پیش ہون توں انکارکیتا، تحریری جواب وی نہیں دتا، اگر ایہ الزام آئے گا کہ تُسی گرفتار کیوں کیتا تے تحقیقات کیوں کیتی تے ایس طرح دے جرماں نوں کس طرح کنٹرول کر سکدے ہاں۔اپنے اک ٹوئٹ وچ رانا ثنا اللہ نے آکھیا کہ نوٹساں دے باوجود عمران پیش نہیں ہوئے، قومی خزانے نوں نقصان پہنچان اُتے نیب ولوںگرفتاری کیتی گئی اے، اوہناں اُتے کسی قسم دا کوئی تشدد نہیں کیتا گیا۔