پارلیمان آئین دا مصنف ادارہ اے،سپیکرقومی اسمبلی

اسلام آباد(پنجابی میڈیا گروپ)سپیکر قومی اسمبلی راجہ پرویز اشرف نے آکھیااے کہ پارلیمان طاقت دا مرکز،آئین دا مصنف تے واحد قنون ساز ادارہ اے،عوام دی مرضی پارلیمان توں جنم لیندی اے تے ساریاں اداریاں نوں عوام دے ایس خود مختار تے اعلیٰ ادارے دے سامنے جوابدہ ہونا چاہیدا اے،ایہی ساڈے آئین دی روح اے تے ایہ اک ہمہ گیر، باہمی احترام، متنوع تے مکالمے اُتے مبنی پاکستان دا واحد رستہ اے۔بدھ نوں قومی اسمبلی وچ آئین پاکستان دی گولڈن جوبلی دی مناسبت نال منعقدہ2 روزہ عالمی کنونشن دے افتتاحی سیشن نال خطاب کردیاں ہویاں سپیکر نے مندوبین تے پروہنیاں نوں خوش آمدیدآکھیا۔تقریب وچ17 توں وَدھ ملکاں دے مندوبین رَلتی سن۔غیر ملکی رَلتیاں وچ مختلف ملکاں دے سپیکرز ،ڈپٹی سپیکرز،بین الاقوامی قنونی ماہرین تے مختلف شعبیاں دے نمائندے شامل نیں ۔ سپیکر نے آکھیا کہ مینوں بوہت خوشی اے کہ تُسی سارے اسلامی جمہوریہ پاکستان دے آ ئین دی گولڈن جوبلی دی تقریب وچ رَلتی ہوئے، تہاڈی ایتھے موجودگی ایس گل دی عکاس اے کہ تُسی آئین و قنون دی پاسداری، جمہوریت، قنون دی حکمرانی تے عوام دے منتخب نمائندیاں ذریعے اختیاراں دی منتقلی اُتے یقین رکھدے او، سپیکر قومی اسمبلی نے وزیر اعظم پاکستان دا خصوصی شکریہ ادا کردیاں ہویاں آکھیا کہ میں اپنے وزیر اعظم شہباز شریف دا خصوصی طور اُتے شکر گزار ہاں کہ اوہناں نے آئین دے50 ورھیاں دے عنوان اُتے اک مہینے تک جاری رہن والیاں تقریباں وچ ذاتی دلچسپی لئیتے اوہناں دی مسلسل حمایت کیتی،ایہ پارلیمنٹ دی بالادستی اُتے وزیراعظم دے غیرمتزلزل یقین دااظہاراے۔