القادر ٹرسٹ کرپشن کیس:عمران خان دا8دن لئی جسمانی ریمانڈ

اسلام آباد(پنجابی میڈیاگروپ)القادر ٹرسٹ کرپشن کیس وچ احتساب عدالت نے سابق وزیر اعظم عمران خان دا8دناں لئی جسمانی ریمانڈ دے دتا۔نیب ولوں احتساب عدالت توں14دن لئی جسمانی ریمانڈ دی استدعا کیتی گئی سی،خصوصی عدالت دے جج محمد بشیر نے محفوظ فیصلہ سناندیاں ہویاں14دناں دے جسمانی ریمانڈ دی استدعا مسترد کردیاں ہویاں8دناں دے جسمانی ریمانڈ دی منظوری دے دتی ۔نیوگیسٹ ہائوس پلس لائن وچ عمران خان دے خلاف القادر ٹرسٹ کیس دی سماعت احتساب عدالت دے جج محمد بشیر نے کیتی جس سلسلے وچ چیئرمین پی ٹی آئی دے وکیلاں وچ علی بخاری، خواجہ حارث تے بیرسٹر گوہر عدالت وچ پیش ہوئے۔سماعت دے دوران نیب پراسیکیوٹر نے موقف اختیار کیتا کہ نیب نوں ہور تفتیش درکار اے جس لئی عمران خان دا14دناں داجسمانی ریمانڈ دتا جائے۔عدالت نے نیب پراسیکیوٹر دی استدعا دے بعد سماعت وچ وقفہ کردتا جس اُتے عمران خان نے عدالت توں آکھیا کہ اوہ اپنے وکیلاں نال مشورہ کرنا چاہندے نیں، سابق وزیراعظم نے سماعت وچ وقفے دے دوران اپنے وکیلاں نال مشورے کیتے۔وقفے دے بعد دی سماعت دا دوبارہ آغاز کیتاگیا جس وچ پراسیکیوٹر سردار ذوالقرنین، ڈپٹی پراسیکیوٹر نیب مظفر عباسی، سپیشل پراسیکیوٹر رافع مقصود تے تفتیشی افسر میاں عمر ندیم پیش ہوئے، ڈپٹی پراسیکیوٹر نے عدالت نوں دسیا کہ عمران خان نوں گرفتاری ویلے وارنٹ وکھائے گئے سن ۔عمران خان نے جواب وچ آکھیا کہ مینوں نیب آفس پہنچن دے بعد وارنٹ دتے گئے، ڈپٹی پراسیکیوٹر نے عدالت وچ آکھیا کہ سارے ضروری کاغذ عمران خان دے وکیلاں نوں فراہم کردتے جان گے۔دوران سماعت خواجہ حارث نے آکھیا کہ جس طرح عمران خان نوں گرفتارکیتا گیا قنونی طور اُتے گرفتاری غلط اے، ڈپٹی پراسیکیوٹر نیب نے آکھیا کہ اسیں ایتھے کرپشن دا معاملہ بیان کر رہے ہاں، رقم برطانیہ دی نیشنل کرائم ایجنسی نے پھڑی سی، این سی اے نے اوہ رقم حکومت پاکستان نوں واپس گھلی، لُٹی گئی رقم بدنیتی نال بزنس ٹائیکون دے نال ایڈجسٹ کر دتی گئی۔خواجہ حارث نے آکھیا کہ القادر ٹرسٹ چل رہیا اے تے ایس زمین اُتے عمارت بنی ہوئی اے، لوگ القادر ٹرسٹ وچ مفت تعلیم حاصل کر رہے نیں، جیہڑا ٹرسٹی ہُندااے اوہ اک لیگل پرسن ہُندا اے، اوہ پبلک آفس ہولڈر نہیںہُندا،عمران خان اوس ویلے پبلک آفس ہولڈر نہیں سن۔