پنجاب وچ فوج بُلا لئی گئی

لہور(پنجابی میڈیاگروپ)پاکستان تحریک انصاف دے چیئرمین وسابق وزیراعظم عمران خان دی گرفتاری دے بعد پنجاب وچ امن وامان دی صورت حال بہتر کرن لئی فوج تعینات کرن دی منظوری دے دتی گئی۔محکمہ داخلہ پنجاب نے عمران خان دی گرفتاری دے بعد صوبے وچ پی ٹی آئی کارکناں دے پرتشدد مظاہریاں دے پیش نظر امن و امان دی صورتحال وچ بہتری لئی فوج تعینات کرن دی سفارش کیتی سی۔امن وامان دی صورتحال وچ بہتری لئی محکمہ داخلہ پنجاب نے صوبے وچ فوج تعیناتی لئی وفاق نوں ریکوزیشن گھلی سی۔وفاقی حکومت نے پاک فوج نوںآرٹیکل245 تحت تعینات کرن دی منظوری دے دتی۔پاک فوج ضلعی انتظامیہ دی معاونت کرے گی۔خیال رہے کہ چیئرمین تحریک انصاف عمران خان دی گرفتاری دے خلاف ملک بھر ونگوں پنجاب دے مختلف شہراں وچ احتجاج جاری اے۔پی ٹی آئی کارکناں دے پُرتشدد مظاہریاںدے نتیجے وچ جاں بحق افراد دی تعداد 4ہوگئی جدکہ درجناں زخمی نیں۔ ملک دے وڈے شہراں وچ دفعہ144نافذ اے۔