تحریک انصاف دے رہنما اسد عمرتوں بعد شاہ محمود قریشی وی گرفتار

اسلام آباد(پنجابی میڈیا گروپ)اسد عمردے بعد تحریک انصاف دے وائس چیئرمین شاہ محمود قریشی نوں وی گرفتارکر لئیا گیا۔پلس حکام نے گرفتاری دی تصدیق کردیاں ہویاں آکھیا اے کہ سابق وزیرخارجہ شاہ محمود قریشی نوں اسلام آباد دے ریڈ زون توں حراست وچ لئیا گیا اے۔ایس توںپہلاں پاکستان تحریک انصاف دے مرکزی رہنما و سیکرٹری جنرل اسد عمرنوں اسلام آباد ہائیکورٹ توں گرفتارکیتا گیا،اسد عمراسلام آباد ہائیکورٹ وچ اک درخواست لے کے آئے سن جس وچ اوہناں نے استدعا کیتی سی کہ اوہنان نوں عمران خان نال ملن نہیں دتا جارہیا۔اسد عمر ایہ درخواست لے کے چیف جسٹس دے کمرہ عدالت وَل گئے جیتھے باہر نکلن ویلے اسلام آباد پلس دے انسداد اَتگردی اسکواڈ اسد عمر نوں گرفتار کر کے روانہ ہوگئی۔اسد عمر، شاہ محمود قریشی، علی اعوان تے ہوراں رہنماواں دے خلاف رات گئے 2مقدمے تھانہ آبپارہ تے ترنول درج کیتے گئے سن،تحریک انصاف دے رہنما اسد عمر نوں16ایم پی او تحت گرفتارکیتا گیا اے۔واضح رہے کہ پچھلے دناں نیب نے سابق وزیر اعظم عمران خان نوں القادر ٹرسٹ کیس وچ اسلام آباد ہائی کورٹ دے احاطے توں گرفتار کرلئیا سی جس دے بعد ملک بھروچ پی ٹی آئی کارکناں ولوں مختلف شہراں وچ احتجاج کیتا جارہیااے۔دُوجے پاسے حکومت ولوں پی ٹی آئی رہنماواں دی گرفتاریاں داسلسلہ وی جاری اے،اج صبح پلس نے پاکستان تحریک انصاف دے رہنما تے سابق ڈپٹی سپیکر قومی اسمبلی قاسم خان سوری دی گھر والی تے بھائی نوں وی گرفتار کیتا اے۔