عمران خان دی رہائی تک تحریک انصاف پُرامن احتجاج جاری رکھے گی:پرویزالٰہی

لہور(پنجابی میڈیاگروپ)سابق وزیراعلیٰ پنجاب چودھری پرویز الٰہی نے وائس چیئرمین تحریک انصاف شاہ محمود قریشی نال گرفتار ہون توں پہلاں موجودہ سیاسی صورتحال اُتے مشاورت کیتی۔ایس موقع اُتے گل بات کردیاں ہویاں تحریک انصاف دے وائس چیئرمین شاہ محمود قریشی نے آکھیا کہ عمران خان عوام دے دلاں وچ وَسدے نیں،اوہ واحد سیاستدان اے جیہڑا چاراں صوبیاں وچ مقبول اے۔تحریک انصاف دے صدرچودھری پرویز الٰہی نے گل بات کردیاں ہویاں آکھیا کہ عمران خان دی وحشیانہ طریقے نال گرفتاری نواز شریف نوں خوش کرن لئی کیتی گئی اے،ملک وچ اج افراتفری دا عالم اے، سارا پاکستان عمران خان دی گرفتاری اُتے احتجاج لئی سڑکاں اُتے اے۔اوہناں نے ہور آکھیا اللہ دی لاٹھی بے آواز اے، انشا اللہ اک دن ضرور انصاف ملے گا، عمران خان بین الاقوامی شہرت رکھن والی شخصیت اے، ساری دنیا دے سربراہواں نے اوہنان دی گرفتاری دی مذمت کیتی اے، عمران خان دی رہائی تک تحریک انصاف دا پُرامن احتجاج جاری رہے گا۔