14 مئی جمہوریت لئی تریخ ساز دن،بلاول بھٹو زرداری

اسلام آباد/کراچی(پنجابی میڈیاگروپ)چیئرمین پاکستان پیپلزپارٹی تے وزیر خارجہ بلاول بھٹو زرداری نے آکھیا اے کہ 14 مئی پاکستان تے جمہوریت لئی تریخ سازدن اے،اج دے دن عوام دی مقبول سیاسی قائد محترمہ بینظیر بھٹو شہید تے پاکستان مسلم لیگ دے قائد میان نواز شریف نے میثاق جمہوریت دے دستاویزاُتے دستخط کیتے سن۔ اپنے پیغام وچ چیئرمین پیپلزپارٹی بلاول بھٹو زرداری نے آکھیا کہ میثاق جمہوریت اُتے ثابت قدمی نال عمل کرن اُتے ملک دے وقار وچ اضافہ ہوئے گا تے جمہوریت مضبوط ہوئے گی ، بلاول بھٹو زرداری نے آکھیا کہ صدرآصف علی زرداری نے میثاق جمہوریت اُتے عمل کردیاں ہویاں18 ویں آئینی ترمیم ذریعے صدر نوں حاصل سارے اختیار پارلیمان دے حوالے کیتے سن،چیئرمین پیپلزپارٹی بلاول بھٹو زرداری نے آکھیا کہ 18 ویں آئینی ترمیم وفاق تے ساریاں اکائیاں دے درمیان اک میثاق اے چیئرمین پیپلزپارٹی نے آکھیا کہ اج پارلیمان اُتے حملے ہو رہے نیں تے اوس دے اختیاراں نوں چیلنج کیتا جا رہیا اے تے نوا آئین لکھیا جا رہیا اے جیہڑا پاکستان پیپلزپارٹی نوں کسی صورت منظور نہیں اے۔