پاکستان ول کسی نوں میلی اکھ نال ویکھن دی اجازت نہیں دیاں گے:نوازشریف

لہور(پنجابی میڈیاگروپ)مسلم لیگ(ن)دے قائد محمد نواز شریف نے آکھیا اے کہ پاکستان ول کسی نوں میلی اکھ نال ویکھن دی اجازت نہیں دیاں گے،مینوں ہر دوروچ مدت پوری نہیں کرن دتی گئی۔لہور وچ جلسے نال ٹیلی فونک خطاب کردیاں ہویاں سابق وزیر اعظم نواز شریف نے آکھیا کہ اج دے دن پاکستان دنیا دی 27ویںایٹمی طاقت بن کر اُبھریا، خواہش سی کہ دنیا دی 27ویں معاشی طاقت وی بنیئے، اسیں کسی دے خلاف جارحانہ عزائم نہیں رکھدے، امتحانی گھڑی وچ اللہ نے ہتھ پھڑیا تے درست فیصلے دی توفیق دتی، افسوس نال کہنا پہ رہیا اے کہ کجھ لوکاں نے میریاں لَتاںکھیچنا شروع کر دتیاں ۔ مسلم لیگ (ن)دے قائد نواز شریف نے آکھیا نہ جانے اوہناں لوکاں نوں کیہ پیڑ اے ہسدے وَسدے ملک نوں خراب کر دیندے نیں، ملک توں اتگردی، بدامنی، لوڈشیڈنگ کس نے ختم کیتی؟2017وچ ڈالر104تے اج300روپے دا اے،میرے دوروچ پٹرول60تے اج270روپے لیٹراے، پاکستان نوں نفرت دی اگ وچ جھونکن تے عوام نوں گمراہ کرن تے ملک نوں کئی سال پیچھے دھکیلنے والے بے نقاب ہوگئے۔سابق وزیر اعظم نواز شریف نے ہور آکھیا اے کہ اللہ نے ایہ وطن9مئی ورگے یوم سیاہ لئی نہیں بلکہ28مئی ورگے روشن دن لئی عطا کیتا اے، میں پاکستان دی بڑے خلوص و محبت دے نال خدمت کیتی اے، قوم نوں اپنی اولاد سمجھیا اے لیکن ایس گل دا افسوس رہندااے کہ تینوں وار مینوں کسی نہ کسی بہانے مقدس مشن نوں اگے ودھان توں محروم رکھیا گیا تے بعدوچ محروم کردتا گیا۔