پنجاب الیکشن کیس،عدلیہ دی آزادی دا تحفظ کرنا اے،چیف جسٹس

اسلام آباد(پنجابی میڈیا گروپ)سپریم کورٹ آف پاکستان وچ پنجاب وچ الیکشن کران دے فیصلے خلاف الیکشن کمیشن دی نظرِثانی درخواست اُتے سماعت دوران چیف جسٹس عمر عطا بندیال نے ریمارکس دتے کہ عدلیہ دی آزادی داتحفظ کرنا اے،خفیہ ملاقاتاں نال معاملات نہیں چل سکدے۔الیکشن کمیشن آف پاکستان، وفاقی تے صوبائی حکومتاں ولوں دائر نظرِثانی درخواست اُتے چیف جسٹس عمر عطا بندیال دی سربراہی وچ جسٹس اعجاز الاحسن تے جسٹس منیب اختر اُتے مشتمل 3رکنی بینچ نے سماعت کیتی۔سماعت دے شروع اُتے اٹارنی جنرل روسٹرم اتے آگئے تے عدالت توں مخاطب ہُندیاں ہویاں آکھیا کہ میں کجھ گل کرنا چاہندا ہاں،صدرمملکت دی منظوری بعد نظرثانی قنون بن چکیا اے۔اوس اُتے جسٹس منیب اختر نے ریمارکس دتے کہ نظرثانی قنون بارے سن کے وکیل الیکشن کمیشن دے چہرے اُتے مسکراہٹ آئی۔ایس دوران اٹارنی جنرل نے صدر دا دستخط شدہ نوٹی فکیشن وی عدالت وچ پیش کر دتا، نوٹی فکیشن دی دستیاب کاپی مطابق صدر مملکت ڈاکٹر عارف علوی نے 26 مئی نوں نویں قنون دی منظوری دے دتی ۔دوران سماعت اٹارنی جنرل نے بینچ اُتے اعتراض کردیاں ہویاں آکھیا کہ سپریم کورٹ ریویو ایکٹ ہُن قنون بن چکیا اے، نویں ایکٹ تحت نظر ثانی دائرہ کار ہُن اپیل ورگا ہی ہوئے گا، ہُن نظرثانی نوں فیصلہ دین والے بینچ توں لارجر بینچ ہی سن سکدا اے۔چیف جسٹس نے ریمارکس دتے کہ جمعرات نوں پریکٹس اینڈ پروسیجر ایکٹ کیس سماعت لئی مقرر اے، ایس کیس نوں فیر اُسی دن سناں گے۔چیف جسٹس نے ریمارکس دتے کہ184 (3)دے دائرہ اختیاردے کسی حد تک جائزے دی لوڑ اے، ایس دے حوالے نال ساڈے فیصلے وی کجھ رستے تجویز کردے نیں،کیا دُوجے فریق نال ایس ایکٹ بعد کوئی گل ہوئی؟ایس کیس نوں فیر دُوجے فریق دی موجودگی وچ سناں گے۔اٹارنی جنرل نے آکھیا کہ پی ٹی آئی دے وکیل علی ظفر چھٹی اُتے نیں ایس اُتے چیف جسٹس نے ریمارکس دتے کہ تُسی ایس بارے وی حکومت توں ہدایت لے لوو، نوا قنون آچکیا اے اسیں گل سمجھ رہے ہاں، اج سماعت ملتوی کردیندے ہاں، تحریک انصاف نوں وی قنون سازی دا علم ہوجائے گا۔چیف جسٹس نے اپنے ریمارکس وچ آکھیا کہ تُسی آڈیو لیکس کمیشن کیس وچ ساڈا حکمنامہ پڑھیا ہوئے گا، ذہن وچ رکھو کہ عدالت نے کمیشن کالعدم قرار نہیں دتا،عدالت نوں عدلیہ دی آزادی دا تحفظ کرنا اے، خفیہ ملاقاتاں نال معاملات نہیں چل سکدے۔