میرے خلاف مقدمے جھوٹے تے سیاسی نیں:عمران خان

لہور(پنجابی میڈیا گروپ)جناح ہائوس حملے دی تحقیقات لئی بنائی گئی جے آئی ٹی وچ چیئرمین پاکستان تحریک انصاف عمران خان دی بجائے اوہناں دے نامزد کردہ نمائندے پیش ہو گئے۔سابق وزیر اعظم عمران خان ولوں جے آئی ٹی دی تحقیقات وچ شمولیت لئی باضابطہ تحریری بیان جمع کروایا گیا،عمران خان دے مقررکردہ نمائندے علی اعجاز بٹر،نعیم حیدرپنجوتھا ایڈووکیٹ نے عمران خان دا تحریری بیان جے آئی ٹی وچ جمع کروایا۔عمران خان نے اپنے جواب وچ آکھیا اے کہ جے آئی ٹی نے10 مئی نوں درج کیتے گئے مقدمے دی تحقیقات وچ شامل ہون دا نوٹس گھلیا،نوٹس کل موصول ہویا جس دے جواب لئی مہلت نہایت محدود سی، پہلاں توں طے شدہ شیڈول مطابق مینوںاج انسداد دہشت گردی دی عدالت تے ہائی کورٹ وچ پیش ہونا سی،ایس معاملے اُتے لہوردی انسدادِ دہشت گردی عدالت پہلاں ہی ضمانت دے چکی اے۔سابق وزیر اعظم نے ہور آکھیا کہ مینوں سپریم کورٹ آف پاکستان دے حکم اُتے رہا کیتا گیا اے،اپنے خلاف وڈی تعداد وچ جھوٹے مقدمیاں دے اندراج دے باوجود تحقیقاتی اداریاں نال مکمل تعاون کر رہا ہاں، میرے خلاف مقدمے جھوٹے تے غلط نیں جنہاں دی وجوہات سراسر سیاسی نیں، اپنے بنیادی حقوق دی سنگین خلاف ورزیاں دے باوجود ایس مقدمے دی تحقیقات دا حصہ بنن لئی تیار ہاں۔اوہناں نے جواب وچ آکھیا کہ میں پاکستان دے22ویں وزیر اعظم دے طور اُتے خدمات سرانجام دے چکیا ہاں، وزیرآباد وچ اک نہایت خطرناک قاتلانہ حملے دا نشانہ بن چکیا ہاں،اپنی سلامتی نوں لاحق سنگین خطریاں دے باوجود عدالتاں وچ پیشی ناگزیراے،خطرات تے سکیورٹی دے انتظاماں اُتے اٹھن والے نجی سرکاری خرچیاں دے پیش نظر زمان پارک توں تحقیقات وچ شامل ہونا قابل تحسین ہوئے گی۔