شمالی وزیرستان: اتگرداں دی پولیو ٹیم اُتے فائرنگ،1فوجی جوان شہید

راولپنڈی(پنجابی میڈیا گروپ)شمالی وزیرستان وچ پولیو ٹیم اُتے فائرنگ بعد اتگرداں دا مقابلہ کردیاں ہویاں پاک فوج دا اک جوان شہید ہو گیا۔پاک فوج دے شعبہ تعلقات عامہ(آئی ایس پی آر)ولوں جاری بیان وچ آکھیا گیا اے کہ ات گرداں نے انسداد پولیو ٹیم اُتے فائرنگ شمالی وزیرستان دے علاقے سپین وام وچ کیتی، اتگردی دی ایہ کارروائی علاقے وچ پولیو مہم نوں متاثر کرن لئی کیتی گئی، پولیو ٹیم دی حفاظت اُتے مامور سکیورٹی ٹیم نے اتگرداں دا مقابلہ کیتا تے فائرنگ دے تبادلے وچ اک جوان جام شہادت نوش کر گیا۔آئی ایس پی آر مطابق سکیورٹی فورسز نے جنوبی وزیرستان دے علاقے دوسالی وچ خفیہ اطلاع اُتے آپریشن کیتا، ایس دوران سکیورٹی فورسز نوں ات گرداںولوں بھرپور مزاحمت دا سامنا رہیا، فائرنگ دے شدید تبادلے وچ 2 ات گرد مارے گئے، ہلاک ات گرداں توں اسلحہ تے گولہ بارود وی برآمد کر لئیا، دونوں ات گرد سکیورٹی فورسز تے معصوم شہریاں اُتے حملیاں وچ ملوث سن ۔