پلس نے اَتگردی وچ ملوث لوکاں نوں24گھنٹے وچ پھڑیا،محسن نقوی

ننکانہ صاحب( پنجابی میڈیا گروپ)وزیر اعلی پنجاب محسن نقوی نے آکھیا اے کہ اَتگردی دے کجھ واقعات ہوئے، پلس نے 24 گھنٹے اندرساریاں ملزماں نوں پھڑیا۔وزیراعلی پنجاب محسن نقوی نے تھانہ ننکانہ وچ پنجاب پلس کمانڈ اینڈ کنٹرول سنٹر دا افتتاح کر دتا، ایس موقع اُتے چیف سیکرٹری، آئی جی پنجاب وی موجود سن، وزیر اعلی دی آمد اُتے سکیورٹی دے سخت انتظام کیتے گئے۔پنجاب پلس کمانڈ اینڈ کنٹرول سنٹر دے افتتاح بعد میڈیا نال گل کردیاں ہویان نگران وزیراعلی پنجاب دا کہنا سی کہ سنٹر ذریعے شہر بھر نوں کیمریاں نال مانیٹر کیتا جائے گا، سیف سٹی نے دن رات لا کے ایس پروجیکٹ نوں مکمل کیتا اے، ایہ 40 کروڑ دا پروجیکٹ سی جس نوں35 کروڑ وچ مکمل کیتا گیا اے۔اونہاں نے آکھیاکہ سیف سٹی دا ایہ پروجیکٹ کرائم نوں وی کنٹرول کرے گا، جیتھے جیتھے لوڑ پئی اسیں اوتھے وی ایس طرح دے پروجیکٹ لانچ کراں گے۔محسن نقوی دا کہنا سی کہ اَتگردی دے کجھ واقعات ہوئے نیں، پلس نے 24 گھنٹے اندر ساریاں لوکاں نوں پھڑیا اے، اَتگردی وچ ملوث گرفتار لوکاں نوں عدالت وچ پیش کیتا جائے گا، نیشنل ایپکس کمیٹی وچ فیصلہ ہویا سی اسلام دے نام اُتے کسی قسم دی اَتگردی دی اجازت نہیں ہوئے گی۔