فلسطینیاں دے حق وچ جلسے دی اجازت نہ ملن اُتے چیف جسٹس نوٹس لین،تحریک انصاف

اسلام آباد( پنجابی میڈیا گروپ)تحریک انصاف نے مظلوم فلسطینیاں نال اظہار یکجہتی لئی جلسے دی اجازت نہ ملن اُتے چیف جسٹس نوں نوٹس لین دا مطالبہ کردتا تے آکھیا اے کہ اسرائیلی ظلم خلاف خموشی اختیارکرن والیاں نوں تریخ معاف نہیں کرے گی۔میڈیا دے مطابق پاکستان تحریک انصاف نے پرامن عوامی اجتماع دے انعقاد دی اجازت نہ ملن اُتے آکھیا اے کہ انتظامیہ ولوں تحریک انصاف نوں مظلوم فلسطینیاں نال اظہار یکجہتی لئی پُرامن اجتماع دے انعقاد دی اجازت نہ دینا نہایت شرم ناک تے قابلِ مذمت اے، قائد اعظم دے اسرائیل اُتے اصولی موقف نوں فراموش کرکے اپنے بیرونی آقاں دے خوف توں اسرائیلی ظلم خلاف خموشی اختیارکرن والیاں نوں تریخ معاف نہیں کرے گی۔ترجمان تحریک انصاف نے آکھیا اے کہ مظلوم فلسطینی بھائیاں نال اظہار یکجہتی لئی سب توں موثر آواز دی صورت میدان وچ آن والی جماعت نوں سیاسی بنیاداں اُتے انتقام دا نشانہ بنایا جا رہیا اے ترجمان نے ہور آکھیا اے کہ معزز چیف جسٹس توں اپیل اے کہ تحریک انصاف نوںپرامن عوامی اجتماع توں روکن دا نوٹس لیدیاں ہویاں ذمہ داراں توں جواب منگیا جائے، پاکستانی قوم ہر غیر آئینی وغیر جمہوری حربے دے باوجود ہمیشہ ونگوں مشکل دی ایس گھڑی وچ اہلِ فلسطین دے نال کھڑی اے۔