فلسطین دی ہر طرح مدد لئی تیار ہاں، نگران وزیر خارجہ

اسلام آباد(پنجابی میڈیا گروپ)نگران وزیر خارجہ جلیل عباس جیلانی نے آکھیا اے کہ اسرائیلی حملیاں دی شدید مذمت کردے ہاں، فلسطین نوں ہر طرح دی امداد فراہم کرن لئی تیار ہاں ۔ پریس کانفرنس کردیاں ہویاں نگران وزیر خارجہ جلیل عباس جیلانی نے آکھیا کہ شہری آبادی اُتے حملیاں تے غزہ دے محاصرے دی پر زور مذمت کردے ہاں، اسرائیل فلسطین بارے اقوام متحدہ دیاں قرارداداں دااحترام کرے، اسرائیل 6 دہائیاں توں وَدھ عرصے توں فلسطین اُتے ظلم کر رہیا اے۔اونہاں نے آکھیا کہ پاکستان ہمیشہ توں مسئلہ فلسطین اُتے واضح موقف رکھدا اے، اسرائیلی حملیاں وچ معصوم فلسطینی عورتاں تے بال مارے جا رہے نیں، پاکستان 1967 توں پہلاں دیاں سرحداں، القدس الشریف دارالحکومت دے نال آزاد فلسطینی ریاست چاہندا اے۔