الیکشن کمیشن دی ساریاں ووٹراں نوں ووٹ دا اندراج یقینی بنان دی ہدایت

لہور( پنجابی میڈیا گروپ)الیکشن کمیشن آف پاکستان نے 25 اکتوبر توں پہلاں ساریاں اہل ووٹراں نوں اپنے تے اہل خانہ دے ووٹ دااندراج یقینی بنان دی ہدایت کیتی اے۔ترجمان الیکشن کمیشن نے اپنے اک بیان وچ آکھیا اے کہ ووٹ دے اندراج وچ صرف 10 دن رہ گئے نیں،سارے اہل پاکستانی اپنے تے اپنے اہل خانہ دے ووٹ دے اندراج نوں یقینی بنان، 25 اکتوبر 2023 نوں ملک بھر وچ ساریاں انتخابی فہرستاں نوں منجمد کر دتا جائے گا، جس دے بعد کسی وی ووٹ دا نہ ہی اندراج ہو سکے گا تے نہ ووٹ دی منتقلی ہو سکے گی۔الیکشن کمیشن دے ترجمان نے آکھیا کہ 28 ستمبر توں25 اکتوبر 2023 تک انتخابی فہرستاں نوں غیر منجمد کیتا ہویا اے، 25 اکتوبر 2023 تک سارے اہل بندے جنہاں دے کول شناختی کارڈ موجود اے اوہ اپنے ووٹ دا اندراج کرا سکدے نیں، ساریاں ضلعیاں وچ ڈسٹرکٹ الیکشن کمشنر بطور رجسٹریشن آفیسر تعینات نیں۔ترجمان دا کہنا سی کہ ووٹ دے اندراج وچ ساریاں نوںمکمل سہولت دتی جارہی اے، ووٹ دا اندراج تے منتقلی فارم 21 اُتے ہُندی اے، اگر کوائف یا ایڈریس وچ کوئی غلطی ہوئے اوہ وی درست کیتی جا سکدی اے۔