فیول پرائس ایڈجسٹمنٹ نوں غیر قنونی قرار دین دا لہورہائیکورٹ دا فیصلہ کالعدم قرار

اسلام آباد( پنجابی میڈیا گروپ)سپریم کورٹ نے فیول پرائس ایڈجسٹمنٹ نوں غیر قنونی قرار دین دا لہور ہائی کورٹ دا فیصلہ کالعدم قرار دیندیاں ہویاں ایہ معاملہ نیپرا اپیلیٹ ٹریبونل نوں گھل دتا۔ میڈیا دے مطابق مختلف کمپنیاں ولوں بجلی دے بلاں وچ شامل فیول پرائس ایڈجسٹمنٹ نوں غیرقنونی قرار دلان لئی کمپنیاں نے لہور ہائی کورٹ توں رجوع کیتا سی لیکن لہور ہائی کورٹ نے اوس نوں جائز قرار دیندیاں ہویاں کمپنیاں دیاں درخواستاں مسترد کردتیاں سن۔کمپنیاں نے لہور ہائی کورٹ دے فیصلے خلاف سپریم کورٹ وچ درخواستاں دائرکیتیاں جیتھے اج سپریم کورٹ نے مختلف سماعتاں بعد لہور ہائی کورٹ دا فیصلہ کالعدم قرار دیندیاں ہویاں فیول ایڈجسٹمنٹ دا معاملہ نیپرا دے اپیلیٹ ٹریبونل وچ گھل دتا۔سپریم کورٹ نے اپنے فیصلے وچ آکھیا کہ لہور ہائی کورٹ دا فیول پرائس ایڈجسٹمنٹ غیر قنونی قرار دین دا فیصلہ آئینی و قنونی طور اُتے قابل عمل نہیں، نیپرا اپیلیٹ ٹریبونل وچ صارف کمپنیاں 15دناں وچ فیول پرائس ایڈجسٹمنٹ خلاف اپیلاں دائر کرن تے نیپرا اپیلیٹ ٹریبونل 10 دن وچ اپیلاں مقرر کرے۔سپریم کورٹ نے آکھیا کہ کمپنیاں تے صنعتاں نوں لہور ہائی کورٹ فیصلے بعد واجب الادا رقم نیپرا اپیلیٹ ٹریبونل فیصلے توں مشروط ہوئے گی۔ بعد وچ چیف جسٹس پاکستان دی سربراہی وچ 3رکنی بنچ نے درخواستاں نمٹا دتیاں۔