اسرائیلی بمباری :2750فلسطینی شہید،1030بال شامل

تل ابیب( پنجابی میڈیا گروپ)غزہ اُتے ہفتے توں جاری اسرائیلی بمباری وچ شہید فلسطینیاں دی تعداد2750تک پہنچ گئی جنہاں وچ 1030بال وی شامل نیں جَد کہ9ہزار 700افراد زخمی تے3لکھ افراد بے گھر ہوچکے نیں، دُوجے پاسے حماس دے طوفان الاقصی آپریشن وچ اسرائیلی ہلاکتاں دی تعداد 1400 ہوگئی تے 4000 زخمی نیں۔عالمی خبر رساں ادارے مطابق فلسطینی حریت پسند تنظیم حماس دے اسرائیل اُتے تریخی تے حیران کن حملے بعد اسرائیلی فوج دی مشتعل ہو کے ہفتے توں غزہ اُتے بمباری جاری اے، اسرائیلی فوج بلاامتیاز رہائشی عمارتاں، عورتاں تے بالاں نوں وی نشانہ بنارہی اے جس پاروں ہلاکتاں وِدھ رہیاںنیں۔فلسطین دی وزارت صحت نے اک ہفتے توں جاری غزہ اُتے اسرائیلی بمباری دے نتیجے وچ ہُن تک1030بالاں سنے 2750 شہادتاں تے9 ہزار 700 افراد دے زخمی ہون دی تصدیق کیتی اے۔دُوجے پاسے اسرائیل دی ہیلتھ منسٹری دا دعوی اے کہ حماس دے حملے وچ اوس دے 1400 شہری ہلاکت تے 4000 زخمی ہوگئے۔اقوام متحدہ نے آکھیا اے کہ غزہ اُتے جاری بمباری سبب تاحال غزہ توں3 لکھ فلسطینی باشندے بے گھر ہو کے کیمپاں وچ پناہ گزیں ہوچکے نیں تے اوہناں دی تعداد وَدھی جارہی اے۔