بشری بی بی دی توشہ خانہ تے190ملین پانڈ سکینڈل وچ ضمانتاں منظور

اسلام آباد( پنجابی میدیا گروپ)سابق خاتون اول بشری بی بی دی توشہ خانہ تے190ملین پانڈ سکینڈل وچ ضمانتاں منظور کر لئیاں گئیاں۔چیئرمین پی ٹی آئی دی گھر والی تے سابق خاتون اول بشری بی بی اپنے وکیل دے ہمراہ توشہ خانہ تے190ملین پانڈ سکینڈل وچ اسلام آباد دی احتساب عدالت وچ پیش ہوئیاں۔دوران سماعت وکیل لطیف کھوسہ نے ڈیوٹی جج راجہ جواد عباس توں استفسار کیتا کہ کافی عرصہ ہوگیا تہانوں ویکھا نہیں جس اُتے جج نے جواب دیندیاں ہویاں آکھیا کہ ہُن نارکوٹکس دی عدالت دا انچارج مل گیا اے۔وکیل نے عدالت وچ موقف پیش کیتا کہ جس دن احتساب عدالت نے درخواست ضمانت نپٹائی اوسی دن نیب نے نوا نوٹس گھل دتا، ڈیوٹی جج نے پچھیا بشری بی بی کیتھے نیں؟ڈیوٹی جج راجہ جوادعباس نے بعد وچ بشری بی بی نوں روسٹرم اُتے سدھ لیا جس اُتے سابق خاتون اول روسٹرم اُتے آگئیاں لیکن ایس توں پہلاں جوڈیشل کمپلیکس دی کسی عدالت وچ بشری بی بی روسٹرم اُتے نہیں آئیاں۔بعدوچ احتساب عدالت اسلام آباد نے بشری بی بی دی 5، 5 لکھ روپے دے مچلکیاں دے عوض توشہ خانہ تے190ملین پانڈ سکینڈل وچ 31اکتوبر تک ضمانتاں منظورکر لئیاں۔