نوازشریف دی گرفتاری دا خدشہ ، ن لیگ دی قنونی ٹیم نے حکمت عملی تیارکرلئی

اسلام آباد ( پنجابی میڈیا گروپ)سابق وزیراعظم نوازشریف دی وطن واپسی دا معاملہ، سابق وزیر اعظم نواز شریف نوں جیل وچ جان توں کسطرح بچایا جائے ،ایس حوالے نال ن لیگ دی قنونی ٹیم نے حکمت عملی تیار کرلئی اے۔ذرائع مطابق العزیزیہ تے ایون فیلڈ ریفرنس وچ نواز شریف ولوں اسلام آباد ہائیکورٹ وچ درخواست دائر کیتی جائے گی، نواز شریف ولوں اونہاں دے وکیلاں ولوں درخواستاں آئندہ 48گھنٹیاں وچ دائر کیتیاں جان دا امکان اے ۔ذرائع داکہنا اے کہ دوناں ریفرنساں وچ نوازشریف دیاں درخواستاں دا ابتدائی مسودہ تیار کرلئیا گیا، اج رات یا کل صبح تک مختلف قنونی نکتیاں اُتے غور بعد درخواستاں دا مسودہ فائنل کیتا جائے گا ۔سابق وزیراعظم نواز شریف ایون فیلڈ تے العزیزیہ ریفرنس وچ سزا یافتہ نیں، احتساب عدالت نے نواز شریف نوں10ورھے قید تے 80لکھ پانڈ دی سزا سنائی سی جدکہ العزیزیہ ریفرنس وچ احتساب عدالت نے نواز شریف نوں 7ورھے قید دی سزا سنائی ۔سابق وزیر اعظم نواز شریف نوں 10 ورھیاں لئی عوامی عہدے لئی وی نااہل قرار دتا گیا سی۔واضح رہے کہ قائد مسلم لیگ ن تے سابق وزیراعظم نوازشریف 21 اکتوبر نوں وطن واپس آن گے۔