ن لیگ دا پارٹی ڈسپلن ہور سخت، پالیسی اُتے تنقید ناقابل قبول

لہور( پنجابی میڈیا گروپ)مسلم لیگ ن دے وڈھیاں دی لہوروچ اہم بیٹھک ہوئی اے جس وچ پارٹی ڈسپلن نوں ہور سخت کر دتا گیا، پارٹی نے نواز شریف دی وطن واپسی توں پہلاں اہم رہنما اصول واضع کیتے نیں۔پارٹی ذرائع مطابق ساریاں رہنماواں نوں پارٹی میٹنگاں وچ ہر قسم دی تنقید تے اختلاف رائے دی مکمل آزادی ہوئے گی، پارٹی رہنما اجلاس اندر کیتے گئے اختلافی نکاتاں نوں باہر کسی وی پلیٹ فارم اُتے بیان نہیں کرن گے۔ن لیگی قیادت نے فیصلہ کیتا اے کہ الیکٹرانک و پرنٹ میڈیا یا سوشل میڈیا پلیٹ فارماں اُتے پارٹی دی کسی وی پالیسی اُتے تنقید ناقابل قبول تصور ہوئے گی، فیصلے اُتے عملدرآمد نہ کرن والے رہنماواں خلاف سخت کارروائی کیتی جائے گی۔خلاف ورزی کرن والے پارٹی رہنما نوں پہلے مرحلے وچ شوکاز نوٹس دتا جائے گا، شوکاز نوٹس دا جواب موصول ہون اُتے انکوائری کمیٹی بنا کے ہور کارروائی اگے ودھائی جائے گی۔