وزیر انسانی حقوق دا اقوام متحدہ نوں اسرائیل، فلسطین تنازع اُتے نوٹس لین دا مطالبہ

اسلام آباد(پنجابی میڈیا گروپ)وزیر انسانی حقوق خلیل جارج نے فلسطین اُتے اسرائیلی حملیاں بارے مذمتی بیان دیندیاں ہویاں آکھیا اے کہ اقوام متحدہ نوں فلسطین وچ انسانی حقوق دیاں خلاف ورزیاں دا فوری نوٹس لینا چاہیدااے۔اپنے اک بیان وچ نگران وفاقی وزیر برائے انسانی حقوق خلیل جارج نے آکھیا کہ فلسطین وچ آئے دن انسانی حقوق دیاں خلاف ورزیاں ہو رہیاں نیں، مشرق وسطی وچ ایس خونی تنازعے نوں دھائیاں لنگ چکیاںنیں جس دا کوئی مستقل حل نظر نہیں آرہیا اے۔اونہاں نے آکھیا کہ عورتاں، بالاں تے بڈھیاں نوں نشانہ بنانا جنگی اصولاں دے خلاف عمل اے، ضروریات زندگی دی سپلائی منقطع کرن دا فیصلہ غیر منصفانہ اے، ناکہ بندی ختم کیتی جائے تے فلسطینی عوام تک انسانی امدادی رسائی دی اجازت دتی جائے۔خلیل جارج نے ہور آکھیا کہ فلسطینی نژاد امریکی منڈے نوں امریکہ وچ چاقو نال قتل کرنا مذہبی جنگ نوں ہوا دینا اے،6سالہ بال نوں فوجی ونگوں اک وڈھے چاقو نال26 وار مارنا کیتھے دی انسانیت اے۔