پاکستان دا اسرائیلی جنگی جرائم اُتے اظہار مذمت، اسپتال اُتے حملہ غیر انسانی فعل قرار

اسلام آباد( پنجابی میڈیا گروپ) صدر پاکستان ڈاکٹر عارف علوی نے غزہ وچ اسپتال اُتے وحشیانہ اسرائیلی فضائی حملے تے اوس وچ عورتاں تے بالاں سنے سینکڑاں افراد جاں بحق ہون اُتے اظہارِ مذمت کیتا اے۔صدر مملکت نے اسرائیلی فضائی حملے دے نتیجے وچ معصوم جاناں دے المناک نقصان اُتے اپنے گہرے افسوس دا اظہار کردیاں ہویاں آکھیا کہ اسرائیل نے اک ہسپتال اُتے حملہ کر کے سارے بین الاقوامی تے اخلاقی اصولاں نوں پامال کیتا۔اونہاں نے اسرائیل ولوں سنگین جنگی جرائم دے ارتکاب اُتے تشویش دا اظہار کر دیاں ہویاں آکھیا کہ اسرائیل شہری آبادیاں تے صحت دیاں سہولتاں نوں بلاامتیاز نشانہ بنا رہیا اے، عالمی برادری اوس دے جنگی جرائم اُتے جوابدہ ٹھہرائے تے اسرائیلی بمباری تے غزہ دے جاری محاصرے نوں فوری طوراُتے روکن لئی فوری اقدام کرے۔ادھر نگران وزیراعظم انوار الحق کاکڑ نے آکھیا کہ غزہ دے ہسپتال اُتے اسرائیلی حملے دی شدید مذمت کردے ہاں، اسرائیلی حملے وچ سینکڑاں شہری شہید ہوگئے۔