بیلٹ اینڈ روڈ انیشی ایٹو خطے لئی گیم چینجر منصوبہ اے،انوار الحق کاکڑ

بیجنگ ( پنجابی میڈیا گروپ)نگران وزیراعظم انوار الحق کاکڑ نے آکھیا اے کہ بیلٹ اینڈ روڈ انیشی ایٹوبی آر آئی ترقی وخوشحالی دے خطے لئی گیم چینجر منصوبہ اے،پاکستان سی پیک وچ ہور ملکاں تے شراکت داراں دا خیر مقدم کرے گا۔نگران وزیراعظم انوار الحق کاکڑ نے اوپن گلوبل اکانومی وچ کنیکٹیویٹی اُتے اعلی سطحی فورم نال خطاب کیتا ، خطاب وچ وزیراعظم نے تیجے بی آر ایف دی کامیاب تنظیم اُتے چینی قیادت نوں مبارکباد دتی نگران وزیر اعظم نے بیلٹ اینڈ روڈ انیشیٹو اُتے صدر شی دے ویژن نوں سراہندیاں ہویاں آکھیا کہ سی پیک بی آر آئی دا فلیگ شپ منصوبہ اے، چین پاکستان اقتصادی راہداری دا 10واں جنم دیہاڑمنا رہیا اے، چین دے ترقیاتی ماڈلاں توں بے حد متاثر ہاں۔اونہاں آکھیا کہ دنیا نوں محولیاتی تبدیلی ،غذائی تحفظ تے بیماریاں دے چیلنج درپیش نیں،سانجھی ترقی تے خوشحالی دے منصوبیاں وچ ہی انسانیت دی فلاح اے۔نگران وزیراعظم داکہنا سی کہ 2013 وچ پاکستان وچ بی آر آئی دے فلیگ شپ منصوبے سی پیک دا آغاز ہویا، سی پیک دے تحت 25ارب ڈالر دے 50منصوبے مکمل ہوچکے نیں۔اونہاں دا کہنا سی کہ کروڑاں لوکاں نوں غربت توں کَڈن اُتے چینی قیادت خراج تحسین دی مستحق اے، پاکستان سی پیک وچ ہور ملکاں تے شراکت داراں دا خیر مقدم کرے گا۔نگران وزیر اعظم نے ترقی پذیر ملکاں وچ بنیادی ڈھانچے دے خلا نوں دور کرن دی فوری لوڑ اُتے زوردتا