اسرائیلی ظلم دی انتہا، ہسپتال اُتے فضائی حملہ،500 توں وَدھ فلسطینی شہید

غزہ( پنجابی میڈیا گروپ)جنگی جنون وچ مبتلا اسرائیل نے سفاکیت دی انتہا کر دتی، صہیونی فوج نے غزہ دے ہسپتال اُتے بمباری کر کے علاج معالجے لئی موجود500 توں وَدھ فلسطینیاں نوں شہید کر دتا جدکہ سینکڑاں شہری شدید زخمی نیں۔اسرائیلی فضائی حملے وچ ہسپتال دی عمارت زمین بوس ہو گئی، حملے دے بعد ہرپاسے و چیخ و پکار سنائی دیندی رہی، حملے وچ شہید ہون والیاں وچ مریض، ڈاکٹر تے نرساں شامل نیں،کئی زخمیاں دی حالت نازک ہون پاروں شہادتاں وَدھن دا خدشہ اے، نشانہ بنن والے ہسپتال وچ ہزاراں شہری علاج لئی پناہ لین لئی موجود سن، قابض فوج نے اقوام متحدہ دی پناہ گاہ اُتے وی فضائی حملہ کیتا۔فلسطینی اتھارٹی (PA) دے صدر محمود عباس نے غزہ وچ الاحلی عرب ہسپتال اُتے اسرائیلی فضائی حملے دے بعد 3 روزہ سوگ دا اعلان کر دتا، پچھلے24 گھنٹیاں وچ رفاہ کراسنگ تے خان یونس وچ حملیاں دوران شہید ہون والیاں دی تعداد 71 ہو گئی، جام شہادت نوش کرن والے فلسطینی مصر وَل جا رہے سن، صہیونی فوج دے حملیاں وچ ہُن تک شہید فلسطینیاں دی تعداد 35 سو توںوَدھ ہوگئی ۔