نواز شریف دے وارنٹ گرفتاری معطل، حفاظتی ضمانت وی منظور

اسلام آباد( پنجابی میڈیا گروپ) احتساب عدالت ولوں سابق وزیراعظم نواز شریف دے دائمی وارنٹ گرفتاری معطل ہون بعد اسلام آباد ہائیکورٹ نے وی24 اکتوبر تک حفاظتی ضمانت منظور کر لئی۔توشہ خانہ گڈیاں دے کیس وچ احتساب عدالت نے نواز شریف دے24 اکتوبر تک وارنٹ گرفتاری معطل کردیاں ہویاں ایئر پورٹ اُتے گرفتاری توں روک دتا اے۔احتساب عدالت دے جج محمد بشیر نے محفوظ فیصلے وچ نوازشریف دی وارنٹ معطلی دی استدعا منظور کردیاں ہویاں24 اکتوبر عدالت پیش ہون دا حکم دتا۔ سماعت شروع ہوئی تے سابق وزیراعظم نواز شریف دے وکیل قاضی مصباح عدالت وچ پیش ہوئے۔وکیل قاضی مصباح نے موقف اپنایا کہ نواز شریف نوں اشتہاری قرار دے کے دائمی وارنٹ جاری کیتے گئے سن، عدالت وارنٹ گرفتاری منسوخ کر دیوتے کیونکہ نواز شریف پیش ہونا چاہندے نیں، 24 اکتوبر نوں عدالت وچ ایہ کیس سماعت لئی مقرر اے تے 21 اکتوبر نوں نواز شریف واپس آرہے نیں، وارنٹ گرفتاری منسوخ کرنا عدالت دا اختیار اے نواز شریف دے وکیل اعظم نذیر تارڑ نے آکھیا کہ احتساب عدالت نے وی دائمی وارنٹ گرفتاری منسوخ کر دتے نیں، ٹرائل کورٹ وچ اشتہاری سن اوتھے وی وارنٹ معطل ہوگئے نیں۔چیف جسٹس نے استفسار کیتا کہ تہاڈے کول آرڈر اے؟ جس اُتے اعظم نذیر تارڑ نے آکھیا کہ آرڈر ہو گیا اے تے وکیل احتساب عدالت توں اجے آ رہے نیں۔