شیخ رشید دی بازیابی لئی آرپی او راولپنڈی نوں ہور اک ہفتے دی مہلت

لہور (پنجابی میڈیا گروپ) لہور ہائی کورٹ راولپنڈی بینچ نے سابق وزیرداخلہ و سربراہ عوامی مسلم لیگ شیخ رشید دی بازیابی لئی آر پی او راولپنڈی نوں آخری وارہور اک ہفتے دی مہلت دے دتی ۔لہور ہائیکورٹ راولپنڈی بینچ وچ سابق وزیر داخلہ شیخ رشید دی حراست خلاف دائر درخواست اُتے سماعت ہوئی ، آر پی او راولپنڈی سید خرم علی تے سی پی او راولپنڈی خالد ہمدانی عدالت وچ پیش ہوئے۔عدالت نے استفسار کیتا کہ آر پی او صاحب دسن کہ شیخ رشید بارے کیہ پیش رفت اے؟ جس اُتے آر پی او نے عدالت توں استدعا کیتی کہ شیخ رشید دی بازیابی لئی کوشش جاری اے ہور مہلت چا ہیدی اے۔عدالت نے ریمارکس وچ آکھیاکہ تے کنا ویلا چاہیدا اے، تہانوں جنا ویلا دتا اے اوس وچ تُسی کیہ کیتا، درخواست گزار دے بیان حلفی تے سی ڈی آرز اُتے کیہ تفتیش ہوئی، جس اُتے آر پی او نے عدالت نوں دسیاکہ درخواست گزار نوں انکوائری لئی بلایا تے اوہ کوئی معقول جواب نہیں دے سکے، جنہاں پلس افسراں اُتے گرفتاری داالزام اے سی ڈی آرز دے مطابق اوہ پنجوں افسر اوس علاقے وچ موجود نہیں سن۔ عدالت نے آکھیا کہ سب نوں پتہ اے کہ شیخ رشید نوں راولپنڈی پلس نے گرفتار کرکے کس دے حوالے کیتا ، عدالت نے آر پی او راولپنڈی نوں آخری وار ہور اک ہفتے دی مہلت دیندیاں ہویاں کیس دی سماعت 27 اکتوبر تک ملتوی کردتی۔