فوجی عدالتاں وچ سویلینزدا ٹرائل شروع

اسلام آباد( پنجابی میڈیا گروپ)فوجی عدالتاں وچ سویلینز دا ٹرائل شروع ہون بارے وفاقی حکومت نے سپریم کورٹ نوں متفرق درخواست وچ آگاہ کر دتا۔وفاقی حکومت نے متفرق درخواست وچ دسیا کہ 9 تے10مئی دے واقعات دی روشنی وچ102افراد گرفتار کیتے گئے، زیر حراست افراد دے مفاد نوں مدنظر رکھدیاں ہویاں ٹرائل کیتا جا رہیا اے تے جیہڑا فوجی عدالتاں وچ ٹرائل وچ قصوروار ثابت نہ ہویا اوہ بری ہوجائے گا۔متفرق درخواست دے مطابق فوجی عدالتاں وچ ہون والا ٹرائل سپریم کورٹ وچ جاری مقدمے دے فیصلے نال مشروط ہوئے گا۔ فوجی عدالتاں وچ ٹرائل بعد جیہڑا قصوروار ثابت ہوئے گا اونہاں نوں معمولی سزاواں ہون گیاں جدکہ 9 تے 10مئی دے واقعات وچ ملوث جیہڑے افراد جرم مطابق قید کٹ چکے اونہاں نوںرہا کردتا جائے گا۔فوجی ٹرائل دے بعد سزا یافتہ قنون مطابق سزاواں خلاف متعلقہ فورم نال رجوع کر سکن گے۔واضح رہے کہ سپریم کورٹ، فوجی عدالتاں وچ سویلینز دے ٹرائل خلاف کیس سماعت کل ہوئے گی۔جسٹس اعجازالاحسن دی سربراہی وچ5 رکنی لارجر بینچ کل ساڑھے 11 وجے سماعت کرے گا۔ جسٹس منیب اختر، جسٹس یحی آفریدی، جسٹس مظاہر نقوی تے جسٹس عائشہ ملک بینچ وچ شامل نیں۔فوجی عدالتاں وچ سویلینز دے ٹرائل دے خلاف کیس دی پچھلی سماعت3اگست نوں ہوئی سی۔