ساڈھے مسئلیاں داواحد حل اللہ دا نظام اے، سراج الحق

شجاع آباد( پنجابی میڈیا گروپ)امیر جماعت اسلامی پاکستان سراج الحق نے آکھیا اے کہ ساڈھے مسئلیاں دا واحد حل اللہ دا نظام اے۔سراج الحق سانحہ تربت وچ شہید ہون والے بے گناہ مزدوراں دے ضلع ملتان دے علاقے شجاع آباد وچ اونہاں دے گھر پہنچ گئے۔ اونہاں نے 5مزدراں دے اَت گردانہ واقعے وچ قتل دی شدید مذمت کردیاں ہویاں سانحے دی تحقیقات دا مطالبہ کیتا۔امیر جماعت اسلامی نے آکھیا کہ غریب مزدور ڈاکہ مارن،لُٹ مار دی بجائے حق حلال لئی شہر چھڈ کے جاندے نیں، ایتھے وزیر اعلی ،وزیراعظم ، گورنر ایس لئی نہیں آئے کہ ایہ کمزور لوگ سن، بلوچستان حکومت اجے تک ایس خاندان دے قاتلاں نوں صرف کمزور ہون پاروں انصاف نہیں دے سکی، ایہ حکمران اندھے بہرے تے گونگے نیں، ایس طرح دا ظلم کسی ملک وچ نہیں ہورہیا۔اونہاں نے آکھیا کہ ایس ملک وچ کمزور داگھر ساڑنا، اوس دی بیٹی نوں اغوا کرنا تے ظلم کرنا آسان اے، ایہ ظلم دانظام اے اسیں اوس نوں قبول نہیں کردے، ایس نظام خلاف اگر کوئی بغاوت نہیں کردا تے اوہ وی ایس وچ رَلتی اے ، ساڈھے مسائل دا اک ہی حل اے اوہ اللہ دا نظام اے۔