بشری بی بی دے بھائی گھر اینٹی کرپشن دے چھاپے

لہور( پنجابی میڈیا گروپ)اینٹی کرپشن دا مفرور ملزماں دی گرفتاری لئی کریک ڈان جاری اے جس دے دوران سابق خاتون اول بشری بی بی دے بھائی، سابقہ ارکان قومی و صوبائی اسمبلی دے گھر چھاپے مارے جارہے نیں۔ترجمان اینٹی کرپشن نے دسیا کہ اینٹی کرپشن نے پچھلی رات ساہیوال ،اوکاڑہ تے پاکپتن وچ مفرور ملزماں دے گھر ریڈ کیتے۔ اینٹی کرپشن ساہیوال نے سابقہ ایم این ایز رائے حسن نواز تے رائے مرتضی اقبال دے گھراں اُتے چھاپے مارے۔سابقہ ایم پی اے نعیم ابراہیم ،سیاسی رہنماسلیم صادق دے گھر اُتے وی چھاپہ ماریا گیا۔ سابق خاتون اول بشری بی بی دے بھائی احمد مجتبی دی گرفتاری لئی وی چھاپہ ماریا گیا۔ لیکن سارے ملزم موقع توں فرار ہوگئے جس دے نتیجے وچ اوہناں دی گرفتاری عمل وچ نہ آ سکی۔ڈی جی اینٹی کرپشن نے ملزماں دی گرفتاری لئی کوششاں تیز کرن دی ہدایت کردیاں ہویاں آکھیا کہ سارے مطلوب ملزماں نوں گرفتارکر کے قنون دے کٹہرے وچ ضرور لیایا جائے گا۔