نواز شریف دا استقبال: آئی پی پی نے عون چودھری توں وضاحت مَنگ لئی

لہور( پنجابی میڈیا گروپ)استحکام پاکستان پارٹی آئی پی پی نے ایئرپورٹ اُتے نواز شریف دا استقبال کرن اُتے عون چودھری نوں شوکاز نوٹس جاری کرن دا فیصلہ کر لیا۔ترجمان استحکام پاکستان پارٹی مطابق عون چودھری دی نواز شریف نال اسلام آباد ایئرپورٹ اُتے ہون والی ملاقات دا پارٹی نال کوئی تعلق نہیں، ایس معاملے اُتے اونہاں توں تحریری وضاحت منگ لئی گئی اے۔استحکام پاکستان پارٹی دے ترجمان نے آکھیا کہ اگر عون چودھری ذاتی حیثیت وچ گئے نیں تے اوس دی فوری وضاحت کرن ۔ واضح رہے کہ مسلم لیگ ن دے قائد میاں نواز شریف پچھلے دن 4 ورھیاں بعد پاکستان پہنچے سن۔اسلام آباد ایئرپورٹ اُتے سینیٹر اسحاق ڈار تے ہور لیگی رہنماواں نے اونہاں دا استقبال کیتا سی ۔لیکن سوشل میڈیااُتے سامنے آن والی ویڈیوز وچ استحکام پاکستان پارٹی دے رہنما عون چودھری نوں وی رن وے دے نیڑے نواز شریف دا استقبال کردیاں ویکھیا گیا۔عون چودھری نے نواز شریف نال مصافحہ کیتا تے گلے ملے جس دے بعد دوناں دے وچکار کجھ دیر گل بات ہوئی، اونہاں نے نوازشریف دی ہیلی کاپٹر دے دروازے تک رہنمائی کیتی۔یاد رہے کہ عون چودھری دا شمار استحکام پاکستان پارٹی دیپیٹرن ان چیف جہانگیر ترین دے نیڑے دے ساتھیاں وچ ہُندااے۔