کفر ملت واحد بن چکیا، اسیں اُمت دی شکل کَدوں اختیار کراں گے؟انیق احمد

اسلام آباد( پنجابی میڈیا گروپ)نگران وفاقی وزیر مذہبی امور انیق احمد نے آکھیا کہ کفر ملت واحد بن چکیا اے اسیں امت دی شکل کَدوں اختیار کراں گے۔نگران وفاقی وزیر مذہبی امور انیق احمد نے جماعت اہل حرم دی چھتر چھاویں اتحاد امت تے مسئلہ فلسطین کانفرنس نال خطاب کردیاں ہویاں آکھیا کہ قرآن فرماندا اے کہ اہل ایمان ہی غالب ہون گے بشرطیکہ اوہ مومن ہون، جیہڑی گل قرآن کریم نے لکھ دتی اوہ حرف آخر اے۔انیق احمد نے آکھیا کہ قرآن کہندا اے کہ جیہڑے لوگ اللہ دی زمین اُتے اوس دا نظام قائم نہیں کردے اوہ ظالم، فاسق تے کافر نیں، فلسطینیاں نال اظہار ہمدردی لئی مسلم دنیا توںکوئی رہنما فلسطین نہیں پہنچیا، امریکی و برطانوی سربراہاں نے اسرائیل پہنچ کے اپنی مکمل حمایت دا یقین دلایا اے۔نگران وفاقی وزیر نے آکھیا کہ مسلماناں دی مومنانہ غیرت کیتھے گم ہو گئی اے، اج وڈھیاں طاقتاں اسرائیل پہنچ کے اظہار یکجہتی کر رہیاں نیں، مسلمان ملک اسرائیل دی کمرشل پروازاں نوں ایئر سپیس دینا فوری بند کرن، او آئی سی صرف مذمتی قرارداداں اُتے اَکتفا نہ کرے بلکہ اک سانجھے لائحہ عمل دا اعلان کرے۔