مسلم لیگ ن دا پی ڈی ایم جماعتاں نال دوبارہ رابطیاں دا فیصلہ

جاتی امرا( پنجابی میڈیا گروپ)پاکستان مسلم لیگ ن نے پی ڈی ایم جماعتاں نال دوبارہ رابطیاں دا فیصلہ کرلیا۔جاتی امرا وچ شریف خاندان دی اہم بیٹھک ہوئی جس وچ پارٹی قائد نوازشریف، صدرشہباز شریف، مریم نواز تے حمزہ شہبازسنے اسحاق ڈار رَلتی ہوئے، نشست وچ نوازشریف دی وطن واپسی اُتے ملکی سیاسی پس منظر اُتے تبادلہ خیال کیتا گیا۔ایس اہم بیٹھک وچ پی ڈی ایم وچ شامل جماعتاں دی لیڈرشپ نال ملاقات تے ٹیلی فون اُتے رابطیاںدا فیصلہ ہویا اے، سابق وزیراعظم شہبازشریف دی تجویز بعد نوازشریف اگلے 2دناں وچ سیاسی رابطے شروع کرن گے، نوازشریف آصف علی زرداری، مولانا فضل الرحمان، عطا اللہ مینگل، بلاول بھٹو زرداری سنے مختلف رہنماواں نال خود رابطے کرن گے۔پارٹی ذرائع مطابق ملاقات وچ طے ہوئیا اے کہ نوازشریف پہلے قنونی معاملات اُتے فوکس کرن گے، نوازشریف پی ڈی ایم دی قیادت دا شکریہ ادا کرن گے۔ایس ملاقات وچ ایہ فیصلہ وی ہویا اے کہ ن لیگ پیپلز پارٹی نال محاذ آرائی دی پالیسی اختیار نہیں کرے گی، ملاقات وچ پارٹی رہنماواں نوں پیپلزپارٹی دی لیول پلیئنگ فیلڈ تے نوازشریف دی واپسی بارے سیاسی محاذ آرائی توں گریزکرن دی تجویز دتی گئی اے۔