90 دناں وچ الیکشن ممکن نہیں، اوہ گل دسو جیہڑی ممکن ہوئے ،چیف جسٹس

اسلام آباد ( پنجابی میڈیا گروپ)چیف جسٹس پاکستان قاضی فائز عیسی نے 90 دناں وچ عام الیکشن دے انعقاد بارے کیس دی سماعت دے دوران درخواست گزار صدر سپریم کورٹ بار توں آکھیا کہ90دناں وچ الیکشن والی گل ممکن نہیں، اوہ گل دسو جیہڑی ممکن ہوئے، سپریم کورٹ نے کیس وچ الیکشن کمیشن تے وفاقی حکومت نوں نوٹس وی جاری کردتا۔سپریم کورٹ وچ90دناں اندر عام الیکشن بارے کیس دی سماعت ہوئی، چیف جسٹس قاضی فائز عیسی دی سربراہی وچ3رکنی بینچ نے درخواستاں دی سماعت کیتی، بینچ وچ جسٹس امین الدین خان تے جسٹس اطہر من اللہ شامل نیں۔درخواست گزار صدر سپریم کورٹ بار ایسوسی ایشن عابد زبیری نال چیف جسٹس نے استفسار کیتاکہ کیا تحریک انصاف تے سپریم کورٹ بار دی درخواست اک جہی اے؟چیف جسٹس نے عابد زبیری توں استفسار کیتا کہ تہاڈے لئی درخواست کَدوں دائر کیتی؟عابد زبیری نے جواب دتا کہ 16 اگست نوں درخواست دائر کیتی جس وچ90 دناں وچ االیکشن دا مطالبہ اے۔