بھارتی فوج دی ریاستی اَت گردی وچ2کشمیری نوجوان شہید

سری نگر( پنجابی میڈیا گروپ)مقبوضہ کشمیر وچ بھارتی فوج نے سرچ آپریشن دی آڑ وچ2 کشمیری نوجواناں نوں گرفتاری دے کجھ گھنٹے بعد بیدردی نال ماورائے عدالت قتل کردتا۔کشمیر میڈیا سروس مطابق جنت نظیر وادی دے ضلع بارہ مولا دے علاقے اڑی وچ قابض بھارتی فوج تے بارڈر سیکیورٹی فورس نے سانجھا سرچ آپریشن کیتا۔گھر گھر تلاشی دے دوران قابض بھارتی فوج نے 2 کشمیری نوجواناں نوں حراست وچ لے لیا جنہاں دی کجھ گھنٹیاں بعد تشدد زدہ تے گولی لگی لاشاں برآمد ہویاں۔بھارت نواز کٹھ پتلی انتظامیہ نے روایتی ڈھٹائی دا مظاہرہ کردیاں ہویاں نوجواناں نوں عسکریت پسند ثابت کرن دی نکام کوشش کردیاں ہویاں آکھیا کہ نوجوان مسلح سن تے سیکیورٹی فورسز نال مقابلہ کررہے سن۔قابض بھارتی فوج نے انسانی حقوق دی سنگین خلاف ورزی کردیاں ہویاں شہیداں دیاں لاشاں اہل خانہ دے حوالے کرن دی بجائے پلس نوں دے دین۔ ماپئے اپنے جگر دے ٹکڑیاں دیاں لاشاں دے حصول لئی دربدر دیاں ٹھوکراں کھان اُتے مجبور نیں۔علاقہ مکیناں نے شہید نوجواناں دے لواحقین ہمراہ احتجاج کیتا تے قابض بھارتی فوج خلاف نعرے بازی کیتی۔ مظاہرین جدوجہد آزادی کشمیر دے نعرے وی اُچے کردے رہے۔