نواز شریف دی سزا معطلی:فیصلے اینج ہون گے تے عدالتاں نوں تالے لادیو،پی پی پی

لہور( پنجابی میڈیا گروپ)نگراں حکومت پنجاب ولوں نواز شریف دی سزا معطل کرن اُتے پیپلز پارٹی رہنما حسن مرتضی نے آکھیا کہ اگر اینج ہی فیصلے ہونے نیں تے عدالتاں نوں تالے کیوں نہیں لا دتے جان؟رہنما پی پی نے نواز شریف نوں لاڈلا پلس بلکہ عمران پلس بنن دی مبارکباد دیندیاں ہویاں آکھیا کہ پنجاب دی نگراں حکومت دا نواز شریف دی سزا معطل کرنا بھونڈا طریقہ اے۔اونہاں نے آکھیاکہ نگراں حکومت ہر اوہ کم کر رہی اے جیہڑے اوس نوں نہیں کرنے چاہیدے، نگراں حکومت مجرماں نوں ریلیف دین نہیں بلکہ الیکشن کروان آئی سی تے نواز شریف دی سزا معطلی دی منظوری دینا نگراں پنجاب کابینہ دا کم نہیں۔حسن مرتضی نے آکھیا کہ الیکشن کمیشن نگراں حکومت دی ایس جانبداری دانوٹس لئے کیونکہ اجے توں صاف نظر آ رہیا اے کہ عمران خان پلس لئی میدان سجایا جا رہیا اے۔رہنما پی پی نے آکھیا کہ پنجاب دیاں جیلاں وچ پئے تے کِنے مجرماں دی سزا پنجاب دی نگراں کابینہ نے معطل کیتی؟ انوکھا لاڈلا کھیڈن نوں چَن منگے گا تے کیا نگراں حکومت اوس نوں چاند لیا کے دیوے گی؟ نگراں حکومت نوں باقی قیدیاں دی سزا وی معطل کر دینی چاہیدی اے اونہاں دا حق نواز شریف توں وَدھ اے۔