ملک وچ الیکشن اک ہی تریخ نوں کران دی درخواست خارج

اسلام آباد( پنجابی میڈیا گروپ) سپریم کورٹ نے عام الیکشن اک تریخ نوں کران دی درخواست خارج کردتی۔سپریم کورٹ وچ ملک اندر اک ہی دن الیکشن کران دی درخواست اُتے سماعت ہوئی۔درخواست گزار وکیل شاہ خاور نے آکھیا کہ سپریم کورٹ نے 4 اپریل نوں فیصلہ دتا کہ 14مئی نوں پنجاب وچ الیکشن کرائے جان، اسیں ایس لئی اک ہی دن پورے ملک وچ الیکشن لئی درخواست دتی تاکہ اتفاق رائے پیدا ہوئے ۔چیف جسٹس پاکستان نے ریمارکس دتے کہ ایہی تے جھگڑاسی کہ اوہ فیصلہ سی کیا، پنجاب الیکشن کیس داآرڈر آف دی کورٹ کدھر اے، بالاں دے آپس وچ جھگڑے اُتے یا زمینی تنازع نوں حل کرن لئی فریقین وچ باہمی رضامندی پیدا کیتی جاسکدی اے، آئینی تقاضا اُتے عمل درآمد لئی عدالت کسطرح کہہ سکدی اے فریقین اتفاق رائے پیدا کرن،کیا سپریم کورٹ آئین نوں تبدیل کرسکدی اے، جنہی مرضی مفاہمت کرو، دنیا بھر دے پارلیمنٹ ارکان بیٹھ جان فیر وی آئین واضح اے۔جسٹس اطہر من اللہ نے آکھیاکہ تہاڈاکیس ایہ ہونا چاہیدا اے کہ آئین دی خلاف ورزی کرن والیاں خلاف سخت کارروائی کیتی جائے۔