سائفر کیس:چیئرمین پی ٹی آئی دی جیل ٹرائل روکن دی استدعا مسترد

اسلام آباد(پنجابی میڈیا گروپ)اسلام آباد ہائیکورٹ نے سائفر کیس وچ چیئرمین پی ٹی آئی دی جیل ٹرائل روکن دی استدعا مسترد کر دتی۔اسلام آباد ہائیکورٹ وچ جسٹس میاں گل حسن تے جسٹس ثمن رفعت اُتے مشتمل 2 رکنی بنچ نے سائفر کیس وچ چیئرمین پی ٹی آئی دی جیل ٹرائل خلاف انٹراکورٹ اپیل اُتے سماعت کیتی، چیئرمین پی ٹی آئی دے وکیل بیرسٹر سلمان اکرم راجہ عدالت وچ پیش ہوئے۔سلمان اکرم راجہ نے آکھیا کہ ساڈھی درخواست 2 مختلف نوٹیفکیشناں نوں چیلنج کرن بارے اے، 27جون تے 29 اگست دے وزارت قنون دے نوٹیفکیشناں نوں چیلنج کیتا سی، جیل ٹرائل دا نوٹیفکیشن وفاقی حکومت نے ازخود جاری کیتا۔چیئرمین پی ٹی آئی دے وکیل سلمان اکرم راجہ نے دلائل دیندیاں ہویاں آکھیا ایہ اک انتظامی نوٹیفکیشن سی جس دا مجاز کمشنر اسلام آباد سی، وفاقی حکومت نہیں۔جسٹس میاں گل حسن نے آکھیا کہ ہو سکدا اے جد فائل مارکنگ لئی چیف جسٹس دے کول جائے تے نوا بنچ تشکیل دے دتا جائے، اجے اسیں تہانوں کوئی عبوری ریلیف نہیں دے سکدے،ایہ درخواست قابل سماعت اے یا نہیں ایس دا فیصلہ وی بعد وچ ہوئے گا، کسی شخص لئی قنون دی خلاف ورزی نہیں کر سکدے۔عدالت نے سائفر کیس وچ ٹرائل روکن دی چیئرمین پی ٹی آئی دی استدعا مسترد کر دتی۔جسٹس میاں گل حسن اورنگزیب نے آکھیا کہ اجے اسیں درخواست اُتے رجسٹرار آفس دے اعتراض ختم کر رہے ہاں۔سلمان اکرم راجہ دا کہنا سی کہ ایہ آکھیا گیا کہ ملزم دی سکیورٹی لئی جیل ٹرائل کیتا جا رہیا اے، ملزم توں تے پچھیا ہی نہیں گیا، نہ ملزم نے آکھیا کہ سکیورٹی خدشے دی بنیاداُتے جیل ٹرائل کیتاجائے۔