اسرائیل ولوں غزہ وچ نسل کشی جاری، شہید بالاں دی تعداد 2ہزار توں وَدھ گئی

غزہ( پنجابی میڈیا گروپ)مغربی طاقتاں دی آشیر باد نال اسرائیل ولوں غزہ وچ نسل کشی جاری اے،ہور حملیاں وچ 436 فلسطینی شہید ہوگئے جنہاں وچ182 بال شامل نیں،7 اکتوبر توں جاری حملیاں وچ شہید بالاں دی تعداد 2 ہزار 55 ہوگئی۔اسرائیلی فضائیہ ولوں غزہ کہ الشاتی کیمپ اُتے رات گئے بمباری کیتی گئی جس وچ182 بال تے درجناں عورتاں سنے 436 فلسطینی شہید ہوگئے۔اوس دے علاوہ خان یونس وچ 3 خانداناں دے 23 افراد شہید ہوئے، الفلوجہ وچ17 افراد نال جین دا حق کھوئیا گیا تے دیر البلاح وچ10 افراد موت دی آغوش وچ چلے گئے۔ بیت لاحیہ تے نوصائرت کیمپ اُتے وی بمباری نال 14 افراد شہید ہوگئے، شیخ رضوان دے علاقے وچ گھر دے باہر بم وجن نال فلسطینی صحافی جاں بحق ہوگیا، حالیہ جنگ وچ شہید فلسطینی صحافیاں دی تعداد 20 ہوگئی۔3 مسجداں اُتے وی اسرائیلی طیاریاں نے بمباری کیتی،7 اکتوبر توں جاری حملیاں وچ شہید مسجداں دی تعداد 31 ہوگئی اے۔7 اکتوبر توں جاری اسرائیلی جارحیت دے نتیجے وچ شہیداں دی تعداد 5 ہزار 200 توںوَدھ ہوچکی اے، جس وچ 2 ہزار 55 بال تے 1100 عورتاں شامل نیں، کل زخمیاں دی تعداد 15 ہزار توںوَدھ ہوچکی اے جنہاںوچ اسپتالاں اندر دوائیاں تے ایندھن دے قلت پاروں ہورمشکلاں دا سامنا اے۔