چیئرمین پی ٹی آئی دے وفادار الیکشن وچ حصہ لین گے، نگران وزیراعظم

لہور(پنجابی میڈیا گروپ)نگران وزیراعظم انوار الحق کاکڑ نے آکھیا اے کہ پی ٹی آئی اتے پابندی نگران حکومت دا مینڈیٹ نہیں، چیئرمین پی ٹی آئی دے وفادار امیدوار الیکشن وچ حصہ لین گے۔میو ہسپتال لہور دے دورے اتے میڈیا نال گل بات کردیاں ہویاں انوار الحق کاکڑ داکہنا سی کہ دورہ پنجاب وچ حکومت دے بوہت سارے منصوبیاں بارے آگاہی ہوئی، تہذیب و ثقافت دے ودھا لئی پنجاب حکومت دیاں کوششاں قابلِ تعریف نیں۔اونہاں نے آکھیا کہ شاہی قلعے دی ثقافتی ورثے دی بحالی خوش دی گل اے، توقع اے کہ ہوراں صوبیاں وچ ثقافتی ورثے نوں محفوظ بنان لئی اپنا کردار ادا کرن گے، پنجاب حکومت نوں جیتھے لوڑ ہوئے گی وفاق مدد فراہم کرے گا۔غیر قنونی طور اتے وسن والیاں غیر ملکیاں نوں وطن واپس گھلن دی ڈیڈ لائن بارے نگران وزیراعظم دا کہنا سی کہ رجسٹرڈ افغان مہاجرین نوں واپس نہیں گھل رہے،غیر قنونی وسن والے تارکین وطن نوں اپنے ملکاں وچ واپس گھلیاجا رہیا اے۔انوار الحق کاکڑ نے آکھیا کہ بوہت سارے لوگ بغیر کسی دستاویزات دے کئی ورھیاں توں وس رہے نیں، ایہ لوگ واپس جان تے قنونی طور واپس آن، کسی وی دوجے ملک دا شہری ویزا لے کے پاکستان آسکدا اے، البتہ کسی دے املاک اتے قبضہ کرنا یا ہتھیانا ساڈھا مقصد نہیں اے۔الیکشن دی تریخ بارے نگران وزیراعظم دا کہنا سی کہ ووٹ دین لئی جنہے تسی بے چین او میں وی اوہناں ہی ہاں، الیکشن دی تریخ دااعلان پورا آئین نہیں اے۔