چیئرمین دی ہدایت اتے پی ٹی آئی ہر سیٹ اتے الیکشن لڑے گی: حامد خان

اڈیالہ(پنجابی میڈیا گروپ)سینئر قنون دان حامد خان نے آکھیا کہ چیئرمین پی ٹی آئی دی ہدایت اتے پی ٹی آئی الیکشن وچ بھرپور حصہ لیندیاں ہویاں ہر سیٹ اتے الیکشن لڑے گی۔سینئر قنون دان حامد خان نے اڈیالہ جیل دے باہر میڈیا نال گل بات کرداں ہویاں آکھیاکہ مختلف مقدمیاں بارے چیئرمین پی ٹی آئی نال ملاقات ہوئی اے،ساہنوں تشویش اے چیئرمین پی ٹی آئی اتے پہلاں وی حملے کیتے جا چکے نیں، اینہے عرصہ توں اونہاں نوں ٹینشن وچ رکھیا ہویا اے، سیاسی جماعتاں نال ہمیشہ گل ہوسکدی اے، باقی کس نال گل ہوسکدی اے اوہ ویلے دے نال نال ہوئے گا، اجے پی ٹی آئی دے نال ظلم و جبر ہو رہیا اے۔حامد خان نے آکھیا کہ باقی جماعتاں نوں کھلی چھٹی اے،اوہ اپنی سیاسی مہم چلا رہیاں نیں، پی ٹی آئی نوں لیول پلیئنگ فیلڈ نہیں مل رہیا، اک پارٹی دا سربراہ مجرم اے اوس نوں سرکاری پروٹوکول وچ لیایئا گیا، ایسطرح دے شخص نوں محسوس ہندا اے کہ پہلاں توں ہی وزیر اعظم نامزد کر دتا گیا، ملک دی سب توں وڈھی سیاسی جماعت نوں ہر قسم دی سیاسی مہم توں روک دتا گیا اے۔