عوام دی عدالت وچ جان نوں تیار ہاں،شہباز شریف

لہور(پنجابی میڈیا گروپ)سابق وزیراعظم تے پاکستان مسلم لیگ ن دے صدر شہباز شریف نے عام الیکشن دی تریخ دے اعلان دا خیر مقدم کر دیاں ہویاں آکھیا کہ مسلم لیگ ن نواز شریف دی قیادت وچ عوام دی عدالت وچ جان نوں تیار اے۔شہباز شریف دا کہنا سی کہ عوامی قیادت آئے گی تے عوام دی زندگی وچ خوش حالی آئے گی، قومی اسمبلی تحلیل کرن والیاں نوں سپریم کورٹ نے اونہاں دے جرم دی سنگینی دس دتی اے،3اپریل تے9مئی دے جرم دی سزا آئین و قنون دی سربلندی تے ریاست دی عملداری دا معاملہ اے۔سابق وزیر اعظم نے آکھیا کہ مسلم لیگ ن واحد جماعت اے جس نے سب توں پہلاں الیکشن دا عمل شروع کیتا، پارٹی دا الیکشن سیل، پارلیمنٹری بورڈز، منشور کمیٹی دی تشکیل ہو چکی اے۔شہباز شریف نے آکھیا کہ یکم نومبر توں امیدواراں توں درخواستاں وصول کیتیاںجان گیاں، ایہ سارے اقدام اوس امر دے عکاس نیں کہ اللہ تعالی دے فضل و کرم نال مسلم لیگ ن الیکشن لئی تیار اے، اللہ تعالی نے موقع دتا تے ملک وچ ترقی دا عمل فیر شروع کراں گے۔