الیکشن انشا اللہ8فروری نوں ہون گے،چیف جسٹس پاکستان

اسلام آباد(پنجابی میڈیا گروپ)چیف جسٹس آف پاکستان جسٹس قاضی فائز عیسی ہوراں آکھیاکہ الیکشن انشا اللہ8 فروری نوں ہون گے۔چیف جسٹس آف پاکستان قاضی فائز عیسی دی سربراہی وچ جسٹس اطہر من اللہ تے جسٹس امین الدین خان اتے مشتمل 3 رکنی بنچ نے ملک وچ عام الیکشن90دناں وچ کران لئی دائر درخواستاںاتے سماعت کیتی۔سپریم کورٹ نے اپنے حکم نامے وچ آکھیا اے کہ صدر مملکت تے الیکشن کمیشن نے عام الیکشن لئی پورے ملک دی تریخ دے دتی، وفاقی حکومت تے صوبائی حکومتاں نے اتفاق کیتا کہ الیکشن دا انعقاد بغیر کسی خلل دے ہوئے گا۔حکم نامے وچ ہورآکھیا گیا اے کہ اٹارنی جنرل نے وی8فروری نوں عام الیکشن دے انعقاد اتے کوئی اعتراض نہیں کیتا، ساریاں ضرورتاںپوری ہون دے بعد الیکشن کمیشن انتخابی شیڈول دا اعلان کرے۔اٹارنی جنرل نے عدالت نوں آگاہ کیتا کہ صدر تے الیکشن کمیشن دی ملاقات کومنٹس عدالت نوںکجھ دیر وچ فراہم کر دتے نیں جس اتے چیف جسٹس نے آکھیا کہ ٹھیک اے فیر کیس نوں آخر وچ ٹیک اپ کر لیندے ہاں، پہلاں اسیں روٹین دے مقدمے سن لیئے، بعد وچ انتخابات کیس سناں گے۔ایس موقع اتے اٹارنی جنرل نے عام الیکشن8فروری نوں کران دا الیکشن کمیشن دا نوٹیفکیشن وی پڑھ کے سنایا۔چیف جسٹس نے آکھیا کہ اگر سب خوش نیں تے ساہنوں کوئی اعتراض نہیں، الیکشن کمیشن تے سارے فریقاں دی رضامندی اے، ساریاں ممبراں نے متفقہ طوراتے تریخ اتے رضامندی دتی لیکن کسی آئینی شق دا حوالہ نہیں دتا، ایس نقطے اتے بحث فیر کدی کراں گے۔