ساہنوں تے لیول پلیئنگ فیلڈ کدی نہیں ملی،اسحاق ڈار

اسلام آباد(پنجابی میڈیا گروپ)مسلم لیگ ن دے سینئر رہنما و سینیٹر تے سابق وفاقی وزیر خزانہ اسحاق ڈار نے آکھیا اے کہ اج لیول پلیئنگ فیلڈ دی گل کیتی جاندی اے، ساہنوں تے کدی لیول پلیئنگ فیلڈ نہیں ملی۔سینیٹ وچ اظہار خیال کردیاں ہویاں اسحاق ڈاردا کہنا سی کہ حقائق ریکارڈ اتے لیندا ہاں، آئین کہندا اے90 دناں وچ الیکشن ہونے چاہیدے نیں، اسیں وی چاہندے ہاں کہ 90 دناں وچ الیکشن ہون، آئین دیاں باقی شقاں وی سامنے رکھنیاں نیں۔اونہاں نے آکھیا کہ مردم شماری نوں2 اگست نوں اتفاق رائے نال منظور کیتا گیا، مردم شماری حتمی ہو جائے تے الیکشن کمیشن نوں حلقہ بندی کرنی اے ، ایسے وچ 90دناں وچ الیکشن غیر آئینی اے،اسیں وی چاہندے ساں90دناں وچ الیکشن ہون۔لیگی رہنما دا کہنا سی کہ پہلاں بجٹ وچ الیکشن لئی مختض رقم5ارب روپے سی، الیکشن کمیشن نوں54ارب روپے درکار سن، اسیں الیکشن کمیشن نوں46ارب روپے دین دا طے کیتا جدکہ پنجاب تے خیبرپختونخوا دے الیکشن لئی اضافی16ارب روپے درکار سن،اسیں فری اینڈ فیئر الیکشن تے لیول پلیئنگ فیلڈ چاہندے ہاں، ساہنوں فیر نتائج وی تسلیم کرنا چاہیدے نیں۔