بے رحم اسرائیلی فوجاں دی بربریت جاری،ہور300فلسطینی شہید

غزہ(پنجابی میڈیا گروپ)اسرائیلی فوج دی غزہ دی پٹی اتے وحشیانہ بمباری جاری اے ، صیہونی فوج نے پچھلے24گھنٹیاں دے دوران ہور300دے نیڑے فلسطینیاں نوں شہید کردتا، مجموعی شہادتاں دی تعداد9ہزار توں تجاوز کرچکی اے۔عرب میڈیا مطابق اسرائیلی مظالم انتہا نوں پہنچ گئے، صیہونی فورسز نے3دناں دے دوران جبالیہ پناہ گزین کیمپ اتے تیجا حملہ کردتا جس وچ ہور3فلسطینی شہید ہوگئے، 3دناں وچ200توں ودھ فلسطینی شہید جدکہ700 توں ودھ زخمی تے100 توںودھ افراد لاپتہ نیں۔صیہونی فورسز نے جبالیہ دے بعد البریج کیمپ اتے وی بم برسا دتے نیں، اسرائیلی فوجاں نے اقوام متحدہ دے امدادی ادارے تحت چلن والے سکول اتے وی بم برسائے۔اسرائیلی حملیاں دے جواب وچ القسام بریگیڈ نے صیہونی فورسز اتے لبنان توں راکٹ داغ دتے، شمالی اسرائیل دے علاقے کریات شمونہ وچ12راکٹ فائر کیتے گئے جس وچ کئی گڈیاں تباہ تے درجناں فوجی زخمی ہوئے نیں۔