صدر تے نگران وزیراعظم سنے سیاسی شخصیتاں دا علامہ اقبال نوں خراج عقیدت

اسلام آباد( پنجابی میڈیا گروپ)صدر مملکت تے نگران وزیراعظم سنے مختلف سیاسی شخصیتاں نے شاعر مشرق دے146ویں جنم دیہاڑ اُتے ڈاکٹر علامہ محمد اقبالؒ نوں خراج عقیدت پیش کیتا اے۔یوم اقبال دے موقع اُتے صدر مملکت ڈاکٹر عارف علوی دا اپنے پیغام وچ کہنا سی کہ برصغیر دے عظیم مفکر، فلسفی ، شاعر تے سیاسی رہنما ڈاکٹر علامہ اقبال نوں خراجِ عقیدت پیش کردے ہاں، اج دے دن پوری قوم مفکرِ پاکستان علامہ اقبال ؒ دی علمی، فکری تے سیاسی خدمتاں دااعتراف کردی اے۔اونہاں نے آکھیا کہ تہاڈی شاعری اردو زبان دی تریخ وچ اک روشن باب دی حیثیت رکھدی اے، تہاڈے اپنے کلام ذریعے مسلمانانِ برصغیر نوں سیاسی جلا بخشی تے اونہاں دے اندر تحریک پیدا کیتی،تُسی قوم نوں خوابِ غفلت توں جگایا تے اپنی تقدیر دا فیصلہ خود کرن دا جذبہ بیدار کیتا۔ڈاکٹر عارف علوی دا کہنا سی کہ علامہ اقبالؒ نے اپنی شاعری تے خطبیاں نال قوم دی رہنمائی کیتی، سیاسی شعور بیدار کیتا، تُسی نوجواناں نوں اپنی شاعری داموضوع بنایا، خودی داجذبہ تے’’عقابی روح‘‘ بیدار کرن دا سبق دتا، تُسی چاہندے سوکہ برصغیر دے مسلمان بالخصوص نوجوان فلسفہ ِ خودی اپناندیاں ہویاں خود اعتمادی سنے اوہ صفتاں پیدا کرن جس نال اوہ قوم دی تقدیر نوں بدل سکن۔