غزہ اُتے اسرائیلی حملیاں وچ تیزی، پچھلے24گھنٹیاں وچ ہسپتالاں،کیمپاں اُتے شدید بمباری

غزہ ( پنجابی میڈیا گروپ)غزہ اُتے پچھلے1مہینیاں توں جاری اسرائیلی فوج دے حملیاں وچ تیزی آگئی ، ظالم فوج نے پچھلے24 گھنٹیاں وچ سکولاں ، ہسپتالاں دے اطراف بمباری دی جدکہ جبالیا، نصیرات تے شاطئی کیمپاں وچ رہائشی عمارتاں نوں وی نشانہ بنایا ۔اسرائیلی فوج دے حملیاں نال عبادت گاہواں تے مسجداں وی محفوظ نہ رہ سکن، اسرائیلی طیاریاں نے طبی سامان دے قافلے اُتے وی حملہ کیتا ، خان یونس وچ اسرائیلی بمباری نال2مسجداں شہید کردتیاں گئیاں۔فلسطینی وزارت صحت دے مطابق حملیاں وچ ہور306فلسطینی جام شہادت نوش کرگئے جنہاں وچ78عورتاں تے139بال شامل نیں ۔ مجموعی طور اُتے شہید فلسطینیاں دی تعداد10ہزار500 توںوَدھ گئی اے جدکہ شہیداں وچ 4ہزار880 بال تے 28 سو توںوَدھ عورتاں شامل نیں ۔اسرائیلی بمباری دا نشانہ بنن والیاں وچ32 ہزار توں وَدھ شہری زخمی ہوئے نیں جدکہ15لکھ شہری بے گھر نیں ۔بمباری نال غزہ دے ہسپتال تے معالج سینٹر تقریبا غیر فعال تے منہدم ہو چکے نیں۔