الیکشن توں پہلاں نواز شریف تے چیئرمین پی ٹی آئی نوں انصاف ملنا چاہیدا اے،جاویدلطیف

لہور(پنجابی میڈیا گروپ)رہنما پاکستان مسلم لیگ وسابق وفاقی وزیرجاوید لطیف نے آکھیا اے کہ الیکشن توں پہلاں میاں نوازشریف تے چیئرمین پی ٹی آئی نوںانصاف ملنا چاہیدا اے۔ماڈل ٹائون وچ پریس کانفرنس کردیاں ہویاں مسلم لیگ(ن) دے رہنما میاں جاوید لطیف نے آکھیا کہ اگرکوئی مجرم اے تے اوس نوں سزاملنی چا ہیدی اے، 9 مئی نوں جوکجھ ہویا اوس نوں معاف نہیں کیتا جاسکدا،جمہوریت دے پودے دی پرورش کرنی چاہیدی اے لیکن9مئی دے پودے دی پرورش غلط ہوئے گی،9مئی دے ماسٹرمائنڈ نوں کوئی معاف نہیں کرسکدا۔سابق وفاقی وزیر نے آکھیا کہ اسیں آئین دی گل کردے ہاں تے آکھیا جاندا اے کہ ڈیوپراسس نہیں اے، چیئرمین پی ٹی آئی نوں آرٹی ایس بند کرکے لیایا گیا، پی ٹی آئی دور وچ ملکی معیشت نوں تباہ کیتا گیا، قاسم سوری تے عارف علوی نے غیرآئینی کم کیتے، صدرڈاکٹرعارف علوی خود آئین توڑن والے نیں، صدرعارف علوی نوں پی ٹی وی اُتے حملے اُتے شرمندگی دا وی خط لکھنا چاہیدا سی۔