اَتگرداں دے غیرقنونی وَسن والیاں نال رابطے نیں، ترجمان دفتر خارجہ

اسلام آباد(پنجابی میدیا گروپ)ترجمان دفتر خارجہ ممتاز زہرا بلوچ نے آکھیا اے کہ ساڈھے کول انٹیلی جنس معلومات نیں کہ اَت گرد پاکستان وچ غیر قنونی وَسن والیاں نال رابطے وچ نیں۔ ترجمان دفتر خارجہ ممتاز زہرا بلوچ دا ہفتہ وار میڈیا بریفنگ وچ کہنا سی اسیں انٹیلیجنس معلومات اُتے افغانستان دی عبوری حکومت نوں اَت گرداں دے ٹھکانیاں خلاف کارروائی دا آکھیا اے،اسیں کالعدم ٹی ٹی پی خلاف ٹھوس کارروائی دے خواہاں ہاں، اسیں چاہندے ہاں پاکستان دی سکیورٹی لئی خطرہ پیدا کرن والا ایہ گروپ ختم کیتا جائے۔اونہاں نے دسیا کہ پاکستان توں58ہزار 368 افراد تریجے ملکاں وچ چلے گئے نیں، پاکستان افغانستان دے نال دوطرفہ تجارت تے ٹرانزٹ ٹریڈ دی سہولت دیندا رہے گا، جعلی دستاویزاں اُتے بنائے گئے کاروبارنوں پاکستانی قنون تحت نمٹیا جائے گا، ایس حوالے نال سیکرٹری داخلہ دی سربراہی وچ اک ٹاسک فورس قائم اے، ایہ ٹاسک فورس غیر قنونی طور اُتے وسن والیاںدیاں پراپرٹیاں دا جائزہ لے رہی اے۔مسئلہ کشمیر بارے گل بات کردیاں ہویاں ممتاز زہرا بلوچ دا کہنا سی بھارت مقبوضہ کشمیر وچ زمیناں اُتے قبضے وچ مصروف اے، بھارت نے پلوامہ وچ انسانی حقوق دے محافظاں دی زمین قبضے وچ لئی ہوئی اے، پاکستان مسئلہ کشمیر دے حل لئی کشمیریاں دی حمایت جاری رکھے گا۔